თითოეულმა ადამიანმა, რომელიც მიდის საკუთარი სამშობლოს ინტერესების წინააღმდეგ უნდა გაითავისოს, რომ ის, არა მხოლოდ კონკრეტული დანაშაულის ავტორი, არამედ შეიძლება სამშობლოს მოღალატეც გახდეს, – განაცხადა „დღის ქრონიკაში“ განათლების, მეცნიერებისა და ახალგაზრდულ საქმეთა კომიტეტის თავმჯდომარემ გივი მიქანაძემ „ქართული ოცნების“ გადაწყვეტილების შესახებ, რომელიც სისხლის სამართლის კოდექსში „სამშობლოს ღალატის“ მუხლის დამატებას ეხება.
გივი მიქანაძის თქმით, კონკრეტული ადამიანები სარგებლობენ იმით, რომ „სამშობლო ღალატის“ მუხლი არ არსებობს და საკუთარი ქვეყნის წინააღმდეგ მოქმედებენ.
„პოლიტიკურ დღის წესრიგში დადგა ამ მუხლის აღდგენა. წინა ხელისუფლების გადაწყვეტილებით, მაშინდელმა პარლამენტმა ეს მუხლი გააუქმა, ამოიღო სისხლის სამართლის კოდექსიდან, თუმცა, ბოლო წლებში განვითარებული მოვლენები თვალნათლივ გვაძლევს იმის ხედვას, რომ კონკრეტული ადამიანები სარგებლობენ იმით, რომ ეს მუხლი არ არსებობს და შესაბამისად, ისინი მოქმედებენ საკუთარი ქვეყნის წინააღმდეგ.
დაწყებულია კონკრეტული გამოძიება იმ განცხადების საფუძველზე, რომელიც ერთ-ერთმა ორგანიზაციამ შეიტანა პროკურატურაში და გამოძიება მიმდინარეობს იმ საკითხებზე, რომელიც ქვეყნის კონსტიტუციურ წყობილებასთან, მის ფუძემდებლურ პრინციპებთან არის დაკავშირებული.
ბოლო წლების განმავლობაში ის ადამიანები, რომლებიც რადიკალიზმით გამოირჩევიან, ადამიანები, რომლებიც პირდაპირ მიდიან საკუთარი საზოგადოებისა და სახელმწიფოს უდიდესი ნაწილის ინტერესების საწინააღმდეგო, ძირს უთხრიან ამ ქვეყნის წინსვლას და მის სწორ განვითარებას, ამ ყველაფერს თავისი სახელი უნდა დაერქვას.
როდესაც ეს მუხლი აღდგება სისხლის სამართლის კოდექსში, ის არ იქნება რაიმე სანქციის შემცველი, ეს იქნება იდენტური შინაარსის რაც იყო მის გაუქმებამდე, თუმცა. ის მიუთითებს სისხლის სამართლის სხვა მუხლებს, რომელიც კონსტიტუციური წყობილებისა და უშიშროების საფუძვლების წინააღმდეგ მიმდინარე დანაშაულებზეაძირითადად აქცენტირებული“, – აღნიშნა გივი მიქანაძემ.
სისხლის სამართლის კოდექსში „ნაციონალური მოძრაობის“ მიერ გაუქმებული „სამშობლოს ღალატის” მუხლი აღდგება. კოდექსიდან აღნიშნული მუხლი ყოფილმა ხელისუფლებამ 2007 წლის აპრილში, აგვისტოს ომამდე ცოტა ხნით ადრე ამოიღო. მმართველი გუნდი საკითხზე მუშაობას პარლამენტში მიმდინარე კვირაში დაიწყებს.