დიქტატორი არჩევნების გარეშე. ზელენსკიმ სწრაფად უნდა იმოქმედოს, თორემ ქვეყანა აღარ დარჩება, – ამის შესახებ აშშ-ის პრეზიდენტი დონალდ ტრამპი TruthSocial-ის საკუთარ გვერდზე წერს.
ტრამპმა გააკრიტიკა უკრაინის პრეზიდენტი და ისაუბრა უკრაინისთვის გაწეული ამერიკული დახმარების შესახებ.
„წარმოიდგინეთ, საშუალო გაქანების კომიკოსმა, ვოლოდიმირ ზელენსკიმ შეძლო, შეერთებული შტატები დაერწმუნებინა, რომ 350 მილიარდი დოლარი დაეხარჯა ომში, რომლის მოგებაც შეუძლებელია და რომელიც არასდროს უნდა დაწყებულიყო“, – წერს ტრამპი.
ამასთან, შეერთებული შტატების პრეზიდენტი აკრიტიკებს ფინანსური კუთხით გაწეული დახმარების დისბალანსს ევროპასა და აშშ-ს შორის.
„შეერთებულმა შტატებმა ევროპაზე 200 მილიარდი დოლარით მეტი დახარჯა, ევროპის ფული გარანტირებულია მაშინ, როცა შეერთებული შტატები უკან ვერაფერს მიიღებს. რატომ არ მოითხოვა მძინარა ჯო ბაიდენმა თანასწორობა, როცა ეს ომი გაცილებით მნიშვნელოვანია ევროპისთვის, ვიდრე ჩვენთვის – ჩვენ ხომ დიდი, ლამაზი ოკეანე გვაშორებს?“ – აღნიშნა დონალდ ტრამპმა.
ტრამპის მტკიცებით, „ზელენსკი აღიარებს, რომ გაგზავნილი თანხის ნახევარი დაკარგულია“.
„ის უარს ამბობს არჩევნების ჩატარებაზე, უკრაინულ გამოკითხვებში ძალიან დაბალ პროცენტს აჩვენებს. ერთადერთი, რაც კარგად გამოსდიოდა, იყო ის, რომ ბაიდენს თავის დაკრულზე ათამაშებდა. დიქტატორი არჩევნების გარეშე, ზელენსკიმ სწრაფად უნდა იმოქმედოს, თორემ ქვეყანა აღარ დარჩება“, – აღნიშნა ტრამპმა.
ამასთან, ტრამპი საკუთარ როლზე საუბრისას ხაზს უსვამს, რომ მხოლოდ მას და მის ადმინისტრაციას შეუძლიათ რუსეთთან წარმატებული მოლაპარაკებების წარმოება ომის დასასრულებლად. მისი შეფასებით, ბაიდენის ადმინისტრაციას არ გამოუჩენია საკმარისი ინიციატივა მშვიდობის მისაღწევად, ხოლო ევროპის მცდელობები უშედეგო აღმოჩნდა.
„ზელენსკის, სავარაუდოდ, სურს „ფინანსური ნაკადის“ გაგრძელება. მე მიყვარს უკრაინა, მაგრამ ზელენსკიმ საშინელი საქმე გააკეთა, მისი ქვეყანა დანგრეულია და მილიონობით ადამიანი უაზროდ დაიღუპა – და ეს ასე გრძელდება“, – წერს დონალდ ტრამპი სოციალურ ქსელში.