საქართველოს ქალ ფეხბურთელთა ნაკრების მთავარმა მწვრთნელმა ირის ანტმანმა კომენტარი გააკეთა 2025 წლის ერთა ლიგის C დივიზიონის პირველ ტურში ანდორის ნაკრებთან თბილისში გამართულ შეხვედრაზე, რომელიც „ჯვაროსნებმა“ მაიკო ბებიას (84) და თეონა ბაქრაძის (87) გოლებით 2:1 მოიგეს.
„ანდორა თავს ძალიან კარგად იცავდა. თუმცა, ამის მიუხედავად, ბევრი საგოლე მომენტი გვქონდა. ჩვენი შანსები ვერ გამოვიყენეთ, მაგრამ ეს გამოცდილებაა.
ზოგჯერ გვიწევს დაცვიდან თამაში, ზოგჯერ კი უფრო შემტევები უნდა ვიყოთ და დაცვაში ჩამჯდარი გუნდების წინააღმდეგ ასე ვითამაშოთ. ჩვენმა ფეხბურთელებმა ხასიათი გამოავლინეს, როდესაც გაშვებული გოლის შემდეგ მეტოქეს ორი გავუტანეთ.
იგივე გავაკეთეთ ლუქსემბურგის წინაააღმდეგ. ასე რომ, ეს არ იყო პირველი შემთხვევა. თუმცა, ვიმედოვნებ, რომ ამის გაკეთება უკანასკნელად მოგვიწევს და მომავალში პირველები ჩვენ გავიტანთ, რაც გამარჯვებას გაგვიადვილებს.
შემდეგი შეხვედრა კვიპროსთან გვაქვს, რომელიც უკვე დამარცხებული გვყავს. თუმცა, მათ ახალი მწვრთნელი და ახალი ფეხბურთელები ჰყავთ. ვიცით, რომ რთული თამაში გველის, მაგრამ იმედი გვაქვს, რომ მიზანს მივაღწევთ და სამ ქულას მოვიპოვებთ“, – ამბობს ირის ანტმანი.
ერთა ლიგის C2 ჯგუფში, კვიპროსმა მალტა 2:1 დაამარცხა და პირველი ტურის შემდეგ საქართველოსთან ერთად ჯგუფში გალიდერდა. ირის ანტმანის გუნდი მომდევნო მატჩს 25 თებერვალს კვიპროსს ქალაქ ლარნაკაში გამართავს.