საპარლამენტო უმრავლესობის წევრმა, კულტურის კომიტეტის თავმჯდომარემ გიორგი გაბუნიამ გადაცემა „დღის ქრონიკაში“ ჯეფრი საქსის ევროპარლამენტში გაკეთებული განცხადება შეაფასა და აღნიშნა, რომ ამერიკელი პროფესორი, ყოველთვის ღიად აკეთებს კონკრეტულ პოლიტიკურ განცხადებებს.
„საქსი ძალიან საინტერესო ადამიანია, ძალიან ღიად და პირდაპირ აკეთებს კონკრეტულ პოლიტიკურ გზავნილებს, ძალიან საინტერესო განცხადებები აქვს.
„საქართველოს უსაფრთხოების თვალსაზრისი ყოველთვის ჰქონდა გამოწვევები, განსაკუთრებით ამ ბოლო პერიოდში. როდესაც რუსეთ-უკრაინის ომი დაიწყო, ეს საფრთხეები არსებითად გაიზარდა, ჩვენ თავიდანვე ვიცოდით ამ საფრთხეების არსებობის შესახებ და ასე ვთქვათ, ამ საფრთხეების არსებობის და მათი რეალური შეფასების დამსახურებით სწორად იყო აცილებული ის დამანგრეველი შედეგები, რომელიც ჩვენს ქვეყანას ემუქრებოდა.
როდესაც რუსეთ-უკრაინის ომი დაიწყო და რუსეთი უკრაინაში შეიჭრა, გვახსოვს, რა პროცესები წარიმართა საქართველოში. დღეს ვხედავთ რა პროცესები მიმდინარეობს – მთელი მსოფლიო ფოკუსირებულია ამ ომის დამთავრებასთან დაკავშირებით და იმედი გვაქვს, რომ ეს ომი მალე დასრულდება. თუმცა, რა შედეგით დასრულდება კონკრეტულად უკრაინისთვის, ეს კიდევ ცალკე განხილვის საგანია, მაგრამ სამწუხაროდ ვხედავთ, რომ უკრაინის ინტერესები ამ მოლაპარაკების პროცესში იქნება მინიმალიზებული, ამის თქმის საფუძველს მაძლევს ის განცხადებები, რომლებიც კეთდება.
რა შედეგი მიიღო უკრაინამ?! ჩვენ ვხედავთ, რომ სახელმწიფო, რომელიც ერთ-ერთი ყველაზე დიდი სახელმწიფო იყო ევროპაში – ტერიტორიით, მოსახლეობით, დღეს ფაქტობრივად, მიწასთან არის გასწორებული უკრაინული ქალაქები, ათეულობით მილიონი ადამიანი ლტოლვილი, მილიონობით ადამიანი დაღუპული – როგორც სამხედრო პირი, ასევე სამოქალაქო პირი.
ეს პროცესი, რაც უკრაინაში ხდება, კიდევ ერთხელ ჩვენ და საზოგადოებას არწმუნებს იმაში, თუ რა საფრთხეები და სცენარები აიცილა საქართველოს ხელისუფლებამ, რაც საქართველოს წინაშე იდგა“, – აღნიშნა გიორგი გაბუნიამ.
ამერიკელმა პროფესორმა, ჯეფრი საქსმა ევროპარლამენტში გამართული დისკუსიების ფარგლებში საქართველოში განვითარებულ ბოლოდროინდელ პოლიტიკურ მოვლენებზეც ისაუბრა.
„თქვენი ევროპარლამენტარები, ევროპელი პოლიტიკოსები, რომლებიც საქართველოში ჩადიან, ეს ანადგურებს საქართველოს, ეს არ იცავს საქართველოს“, – აღნიშნა ამერიკელმა პროფესორმა.