“ოპოზიციას ის ავტორიტეტი არ აქვს, რომ მარტო მათ სიტყვას ენდოს მოსახლეობა”

„ოპოზიციას ის ავტორიტეტი არ აქვს ხალხში, რომ მარტო მათ სიტყვას ენდოს მოსახლეობა. ამ პირობებში, კონსტიტუციის პროექტის შეცვლისთვის ისეთი აქციების მოწყობა, რომელიც რაიმე რეალურ შედეგს მოიტანს, წარმოუდგენელია. ეს ყველაფერი მათ მხოლოდ პიარზე აქვთ გათვლილი“, – აღნიშნული განცხადება პოლიტოლოგმა რამაზ საყვარელიძემ პორტალ „კვირას“ პრესკლუბში გააკეთა.
ოპოზიციის პროტესტის ერთ-ერთი მიზეზი ახალი კონსტიტუციის პროექტში ასახული მანდატების გადანაწილების საკითხია. საყვარელიძის თქმით, საქართველოში ოპოზიციას პატარა ამბიცია აქვს და მათთვის ერთი ხმაც საბრძოლველია, ამიტომ მისთვის გაუგებარი ამ საკითხზე ხელისუფლების პოზიციაა.
„ ჩვენი ოპოზიციისთვის ხანდახან ერთი ხმაც საბრძოლველია. მათ ამბიციაც პატარა აქვთ – გადალახონ ბარიერი. ბარიერის გადალახვაში კი შეიძლება ერთ ხმაც გამოადგეთ. ამიტომ იმ მცირედს, რომელიც ამ შემთხვევაში სალაპარაკოა, ოპოზიციისთვის აზრი აქვს. უმრავლესობის პოზიცია კი ამ კუთხით გაუგებარია. რაც შეეხება კონსტიტუციის პროექტის გაპროტესტებას, ისინი ამით ვერაფერს შეცვლიან. პოლიტიკოსი ცოცხალია და ხმას იღებს, ამის ილუსტრაციაა ზუსტად – მოვიდა კონსტიტუცია, ხმა ამოიღეს და შეაფასეს. ზოგადად, პროექტს რაც შეეხება, ჩემი სურვილი იქნებოდა, კონსტიტუციის კაპიტალური რემონტი გაკეთებულიყო, აქ უფრო კოსმეტიკური რემონტია, რომელიც აგრეთვე, კარგია“, – აღნიშნა საყვარელიძემ.