“საქართველოს პრეზიდენტმა დაიწყო კამპანია, სახელმწიფო საკონსტიტუციო კომისიის წინაღმდეგ, რომელიც გრძელდება”

“სამწუხაროდ, საქართველოს პრეზიდენტმა დაიწყო მთელი კამპანია, სახელმწიფო საკონსტიტუციო კომისიის წინაღმდეგ, რომელიც გრძელდება და ეს კამპანია გაგრძელდება, როგორც ჩანს, საქართველოს პარლამენტის წინააღმდეგ”, – ამის შესახებ საქართველოს პარლამენტის თავმჯდომარემ, ირაკლი კობახიძემ პრეზიდენტის არჩევის წესთან დაკავშირებით ჟურნალისტებთან საუბრისას განაცხადა.
კობახიძე ამბობს, რომ პარლამენტის საკონსტიტუციო კომისიის წინააღმდეგ პრეზიდენტის თაოსნობით, ოპონენტების მხრიდან არასწორი ნაბიჯები იდგმება.
„უმრავლესობის შეკრება შედგა, სადაც ჩვენ განვიხილეთ უპირატესობები და ნაკლოვანებები, სხვადასხვა საარჩევნო რეგულაციები პრეზიდენტთან დაკავშირებით. ჩვენ მიგვაჩნია, რომ სისტემურად ბევრად მნიშვნელოვანია არაპირდაპირი არჩევნები. იქ დაისვა კითხვა, თუ რისთვის ვატარებთ გაისად პირდაპირ არჩევნებს. განვმარტეთ, რომ აქ საუბარი იყო პოლიტიკურ კომპრომისზე პოლიტიკურ სუბიექტებთან და პოლიტიკურ ძალებთან, რომლებიც ამ საკითხზე საუბრობდნენ. ვთქვით, რომ თუ პოლიტიკურ კომპრომისს ადგილი არ ექნება, პირდაპირ გადავალთ იმ საარჩევნო სისტემაზე, რომელიც მიგვაჩნია სწორად. ჩვენ გვაქვს დიდი იმედი, რომ კომპრომისს აზრი არ დაეკარგება, თუმცა არის კონკრეტული პროცესები, რომლებიც საპირისპიროზე მიუთითებს. სამწუხაროდ, საქართველოს პრეზიდენტმა დაიწყო მთელი კამპანია, სახელმწიფო საკონსტიტუციო კომისიის წინაღმდეგ, რომელიც გრძელდება. ეს კამპანია გაგრძელდება, როგორც ჩანს, საქართველოს პარლამენტის წინააღმდეგ.
ბოლოს შედგა შეხვედრა პრეზიდენტის ადმინისტრაციის უფროსს, პოლიტიკურ პარტიებსა და ე.წ. ექსპერტებს შორის, სადაც ისინი შეთანხმდნენ იმაზე, თუ როგორ უნდა დაგეგმონ ერთობლივი კამპანია საქართველოს პარლამენტის წინააღმდეგ. ჩვენი ოპონენტების მხრიდან არასწორი ნაბიჯები იდგმება, პრეზიდენტის თაოსნობით. ეს არის ძალიან სამწუხარო მოვლენა, პრეზიდენტი უნდა იყოს ზეპარტიული ფიგურა ამ სისტემაში, პარტიებთან თანხმდება, თან თავისი ადმინისტრაციის მეშვეობით, ხვდება პოლიტიკურ პარტიებს და ე.წ. ექსპერტებს და მათთან თანხმდება იმაზე, თუ როგორ უნდა მიიტანონ შეტევა საქართველოს პარლამენტზე“, – განაცხადა ირაკლი კობახიძემ.