საქართველოს პრეზიდენტი გიორგი მარგველაშვილი ფიქრობს, როგორ გამოიყენოს ოპოზიციური პარტიები და ოპოზიციური პარტიები ფიქრობენ იმაზე, თუ როგორ გამოიყენონ პრეზიდენტი, – ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა.
თალაკვაძის თქმით, ცნობილი ხდება, რომ პრეზიდენტი საკუთარი ადმინისტრაციის საშუალებით, ოპოზიციურ პოლიტიკურ პარტიებთან კონსულტაციებს აწარმოებს უკეთესი კოორდინაციის და ერთიანი ძალისხმევის მისაღწევად, რითაც სავარაუდოდ სურს, რომ შეცვალოს გადაწყვეტილებები, რაც კომისიის ფორმატში იყო მიღებული.
„ამას მაშინ აკეთებს, როცა თანამშრომლობის ფორმატებზე პარლამენტს უარს ეუბნება და პარლამენტის გარეთ, ოპოზიციურ პარტებთან თანამშრომლობის ფორმატებს ეძებს. ამ შემთხვევაში ნათელია, რომ პრეზიდენტი ფიქრობს როგორ გამოიყენოს ოპოზიციური პარტიები და ოპოზიციური პარტიები ფიქრობენ, თუ როგორ გამოიყენონ პრეზიდენტი. რაც შეეხება არჩევნების საკითხს, პრეზიდენტის პოზიცია ჯერ არ მოგვისმენია იმის თაობაზე, ფიქრობს თუ არა საპრეზიდენტო არჩევნებში მონაწილეობას, რომელი მოდელით ფიქრობს არჩევნებში მონაწილეობას და გამარჯვებას“, – განაცხადა თალაკვაძემ.