საქართველოს პრემიერ-მინისტრმა გიორგი კვირიკაშვილმა თბილისის სახელმწიფო უნივერსიტეტში საქართველო აშშ-ის დიპლომატიური ურთიერთობების 25-ე წლისთავისადმი მიძღვნილ ღონისძიებაზე, აშშ-ში სწავლის პერიოდი და 1995 წელი გაიხსენა, როდესაც ამერიკაში პირველად ჩავიდა.
„ნება მომეცით, გაგიზიაროთ ჩემი გამოცდილება. ეს მოხდა 1995 წელს, როცა პირველად გავიცანი ამერიკა. იმ წელს, ზოგიერთ თქვენგანს შეიძლება ახსოვს კიდეც, კალიფორნიის დევისის უნივერსიტეტის პროფესორი, სილიციუმის ველის კონცეფციის სულისჩამდგმელი და სილიციუმის ველის ბანკის დამფუძნებელი რობერტ მედრისი ჯორჯ შულცთან ერთად ჩამოვიდა საქართველოში, რათა აქ დაეარსებინა აშშ-ის მიერ დაფინანსებული ტრენინგის პირველი პროგრამა, რომელსაც ერქვა საქართველოს ბიზნეს ტრენინგის პროგრამა პირველ წელს და საქართველოს საბანკო საქმის ტრენინგის პროგრამა მეორე წელს, რომელშიც მე მივიღე მონაწილეობა. წილად მხვდა პატივი, შეიძლება ითქვას, რომ უფრო გამიმართლა, ვყოფილიყავი იმ ათ ქართველ სტუდენტს შორის, რომლებიც სამოქალაქო ომისა და ნგრევის შემდეგ პირდაპირ აშშ-ში ჩავიდნენ. ძალიან რთულია იმ ემოციების გადმოცემა, რომლებიც ჩვენ ყველას დაგვეუფლა ამერიკაში ჩასვლისთანავე. ერთი თვის განმავლობაში ჩვენ კალიფორნიის დევისის უნივერსიტეტში ვესწრებოდით ლიდერობის, საბაზრო ეკონომიკის ლექციებს. შემდეგ დაგვაწყვილეს და გაგვაგზავნეს სხვადასხვა ქალაქში, ზოგი ლოს-ანჟელესში, ზოგიც სან-ფრანცისკოში. ორი ჩვენგანი კი, ჩემი ჩათვლით, აღმოვჩნდით ფრეზნოში, კალიფორნიის შტატის სოფლის მეურნეობის ცენტრში. ჩემი ერთ-ერთი მეგობარი ხუმრობდა კიდეც, კახეთიდან ჩამოვედი აქ, ვენახებით გარშემორტყმულ ადგილასო. ჩვენ ვეხუმრებოდით, რომ ეს ადგილი ზუსტად მასზე იყო მორგებული“, – განაცხადა გიორგი კვირიკაშვილმა.
მისივე თქმით, ამერიკაში შეძენილი გამოცდილება ძალიან მნიშვნელოვანი აღმოჩნდა საბანკო კარიერაში, რადგანაც ის დაკავშირებული იყო სასოფლო-სამეურნეო სესხებთან.
„როცა დავბრუნდი, დავრწმუნდი, რომ ამ გამოცდილებამ გადამწყვეტი როლი შეასრულა ჩემს კარიერაში. აუდიტორიაში ვხედავ საბანკო სექტორში ჩემს პირველ უფროსებს, ჯერ კიდევ 1990-იან წლებში: ემზარ ჯგერენაია, რომელიც ხელმძღვანელობდა საერთაშორისო ურთიერთობების დეპარტამენტს, სადაც მე ვმუშაობდი. ეს იყო ყოფილი საბჭოთა ბანკი, რომელიც იქცა საქართველოს იმპორტ/ექსპორტის ბანკად. ერთი სიტყვით, ეს გამოცდილება ძალიან სასარგებლო აღმოჩნდა ჩემს კარიერაში. სწორედ იმ ორი თვის განმავლობაში გადავწყვიტე სამაგისტრო პროგრამაში მონაწილეობის მიღება ამერიკის შეერთებულ შტატებში. 1997 წელს შევიტანე განაცხადი ედმუნდ მასკის სასტიპენდიო პროგრამაში მონაწილეობის მისაღებად, სადაც მიმიღეს კიდეც. ეს იყო სპეციალური სამეცნიერო და საფინანსო სამაგისტრო პროგრამა, რომლის ფარგლებშიც მე წელიწადზე ოდნავ მეტი გავატარე ილინოისის უნივერსიტეტში, კერძოდ ურბანა-შამპეინში, რომელიც არის ერთ-ერთი უძველესი ამერიკული უნივერსიტეტი, და ეს გამოცდილება მართლაც უნიკალური აღმოჩნდა ჩემს ცხოვრებაში. როდესაც ჩავედი, წარმოდგენაც არ მქონდა, რომ სწორედ იქ იწყებოდა ახალი ეტაპი ჩემს ცხოვრებაში. შევიძინე მეგობრები მთელი მსოფლიოდან. ვესწრებოდი ლექციებს, რომლებმაც მომცა ის გამოცდილება და ცოდნა, რომელიც იმ დროს ჩვენს ქვეყანაში, სამწუხაროდ, ბევრისთვის არ იყო ხელმისაწვდომი. ჩვენ გვასწავლიდნენ საუკეთესო პროფესორები, ხოლო ილინოისის უნივერსიტეტი ცნობილია იმით, რომ მას ძალიან ხშირად სტუმრობენ წამყვანი ამერიკული კომპანიების აღმასრულებელი დირექტორები. კიდევ ერთხელ ვაცხადებ, რომ ამ გამოცდილებას მე არასდროს დავივიწყებ“, – აღნიშნა პრემიერ-მინისტრმა.
მისივე თქმით, აშშ-ში ყოფნის დროს ყველა ქართველი სტუდენტი თავისი სამშობლოს ელჩი იყო.
„გავიხსენებ დროს, როცა მსოფლიოში ცნობილი სუხიშვილების დასი ამერიკაში მართავდა ტურს და კრენერტ ცენტრში გამოდიოდა, და ჩემი 16 თანაკურსელი და უნივერსიტეტის სხვა სტუდენტებიც, ჩემი მეგობრები, დავპატიჟე კონცერტზე. მიუხედავად იმისა, რომ ფინანსურად ეს საკმაოდ რთული იყო ჩემთვის, მაინც გადავწყვიტე, რომ ჩემი მეგობრები უნდა იცნობდნენ ჩემი ქვეყნის კულტურას. არასდროს მინანია, რომ ისინი იმ დღეს კონცერტზე დავპატიჟე, მიუხედავად იმისა, რომ საკრედიტო ბარათზე ამ კონცერტთან დაკავშირებული დავალიანების დასაფარად რამდენიმე წელი დამჭირდა. მიუხედავად ამისა, ეს იყო უნიკალური გამოცდილება. მახსოვს, ცრემლმორეული, რა სიამაყითა ვუყურებდი, როგორ ეზიარებოდნენ ჩემი მეგობრები ქართულ კულტურას. ბევრი მათგანი ამ კონცერტის შემდეგ ჩამოვიდა საქართველოში. გარდა ამისა, ეს პროგრამა იყო უნიკალური გამოცდილება, რადგანაც მან მომცა ის ცოდნა და უნარები, რომლებიც მე შემდეგ გამოვიყენე ჩემს კარიერაში არა მარტო საბანკო სექტორში, არამედ კონსულტანტის სტატუსითაც, როცა კონსულტაციებს ვუწევდი სხვა ქვეყნებს საპენსიო სისტემის სტრუქტურის ჩამოყალიბებასთან, ფასიანი ქაღალდების ბაზრის განვითარებასა და საფინანსო სექტორის რეფორმასთან დაკავშირებით, ასევე ჩემს პოლიტიკურ კარიერაშიც, როცა გავხდი პარლამენტარი და, რასაკვირველია, როცა გავხდი ეკონომიკის მინისტრი და ჩავები ამ ქვეყნის რეფორმების დღის წესრიგის განხორციელებაში“, – აღნიშნა პრემიერ-მინისტრმა.