რუსეთის პრეზიდენტის განცხადებები უკრაინაში ცეცხლის შეწყვეტის მხარდაჭერასთან დაკავშირებით ამერიკის შეერთებული შტატების ფრთხილ ოპტიმიზმს ამართლებს, – ამის შესახებ კრემლის პრესსპიკერმა, დიმიტრი პესკოვმა განაცხადა.
„უდავოდ არსებობს საფუძველი ფრთხილი ოპტიმიზმისთვის. გუშინ მოისმინეთ პრეზიდენტ პუტინის ძალიან მნიშვნელოვანი განცხადება. ჟურნალისტების კითხვებზე პასუხისას მან თქვა, რომ მხარს უჭერს პრეზიდენტ ტრამპის პოზიციას კონფლიქტის მოგვარების საკითხში, მაგრამ წამოჭრა რამდენიმე საკითხი, რომლებზეც ერთობლივად უნდა მოიძებნოს პასუხი“, – განაცხადა პესკოვმა.
კრემლის პრესსპიკერის თქმით, მიუხედავად იმისა, რომ კიდევ ბევრი რამ არის გასაკეთებელი, პუტინმა სოლიდარობა გამოხატა ტრამპის პოზიციასთან დაკავშირებით.
შეგახსენებთ, რუსეთის პრეზიდენტმა, ვლადიმერ პუტინმა პრესკონფერენციაზე განაცხადა: „ვეთანხმებით ზავის იდეას, თუმცა არის ნიუანსები, რომლებზეც მოლაპარაკება უნდა ვაწარმოოთ ამერიკელ კოლეგებთან, შესაძლოა, დავურეკოთ ტრამპს და მასთან განვიხილოთ“.