“ისრაელი არ შეწყვეტს ბრძოლას ვიდრე ყველა მძევალი ღაზიდან სახლში არ დაბრუნდება”

ისრაელი არ შეწყვეტს ბრძოლას, ვიდრე ყველა მძევალი სახლში არ დაბრუნდება და ომის ყველა მიზანი არ იქნება მიღწეული, – ამის შესახებ ნათქვამია ისრაელის თავდაცვის მინისტრის, ისრაელ კაცის განცხადებაში, რომელიც მან ღაზის სექტორში ისრაელის თავდაცვის ძალების მიერ საჰაერო დარტყმების განახლების შემდეგ გაავრცელა.

ისრაელ კაცის განცხადებით, ღაზის სექტორში ჯოჯოხეთის ყველა კარი გაიხსნება და „ჰამასზე“ განხორციელდება დარტყმა აქამდე არნახული ძალით, თუ ის დარჩენილ 59 მძევალს არ გაათავისუფლებს.

„ამ ღამით განვაახლეთ ბრძოლა ღაზაში „ჰამასის“ მხრიდან მძევლების გათავისუფლებაზე უარისა და ისრაელის თავდაცვის ძალების სამხედროებისა და ისრაელური დასახლებებისთვის ზიანის მიყენების მუქარების ფონზე. ჩვენ არ შევწყვეტთ ბრძოლას, ვიდრე ყველა მძევალი სახლში არ დაბრუნდება და ომის ყველა მიზანი არ იქნება მიღწეული“, – ნათქვამია ისრაელის თავდაცვის მინისტრის განცხადებაში.

ისრაელმა ღამით ღაზის სექტორზე დარტყმები განაახლა. „ჰამასის“ მიერ კონტროლირებადი ჯანდაცვის უწყების ცნობით, ანკლავში იერიშების შედეგად, სულ მცირე, 330 ადამიანია დაღუპული.