სტამბოლის უნივერსიტეტმა სტამბოლის მერს, მთავარი ოპოზიციური რესპუბლიკური სახალხო პარტიის ლიდერს, ეკრემ იმამოღლუს დიპლომი გააუქმა, რის გამოც საპრეზიდენტო არჩევნებში მონაწილეობას ვეღარ მიიღებს.
როგორც „როიტერი“ წერს, სტამბოლის უნივერსიტეტმა განაცხადა, რომ პრეზიდენტ რეჯეფ თაიფ ერდოღანის მთავარ პოლიტიკურ ოპონენტს დიპლომი დარღვევების გამო გააუქმა.
იმამოღლუმ კი განაცხადა, რომ უნივერსიტეტის გადაწყვეტილება უკანონოა და მისი იურისდიქციის ფარგლებს სცდება. სტამბოლის მერის თქმით, გადაწყვეტილებას სასამართლოში გაასაჩივრებს.
„ჩვენ ამ უკანონო გადაწყვეტილებას სასამართლოში გავასაჩივრებთ და ვიბრძოლებთ. არ მაქვს იმის რწმენა, რომ სამართლიანი გადაწყვეტილებები იქნება მიღებული, თუმცა არ დავნებდები, არ დავიღლები. ყველაფერი, რაც ხალხმა მოიპოვა და მიაღწია, საფრთხეშია“, – აღნიშნა იმამოღლუმ.