მამუკა ხაზარაძე და მისი ჯგუფი, რომელიც წლების განმავლობაში გამოირჩეოდა იმით, რომ დაახლოებული იყო „ნაცმოძრაობასთან“, წარმოადგენდა მათი ინტერესების გამტარებელს, არ არის გასაკვირი, რომ არ მოდიან კომისიაზე”, – განაცხადა პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველმა მოადგილემ გიორგი ჩაკვეტაძემ საგამოძიებო კომისიის წინაშე მამუკა ხაზარაძის არგამოცხადების შესახებ საუბრისას.
„თითქოს, რაღაც მიზეზების გამო არ მოდიან, რეალურად არ უნდათ, რომ სიმართლე თქვან. სიმართლე არის ერთი, რომ წლების განმავლობაში პარტია „ნაცმოძრაობა“, რომელიც იყო ხელისუფლებაში, არეკეტებდა ჩვენს საზოგადოებას, ართმევდა ბიზნესებს, აწამებდა ადამიანებს და ეს არის გადაწყვეტილებები, რომლებშიც კონკრეტულად ამ პირებსაც აქვთ მონაწილეობა მიღებული. ასე რომ, რაც უნდა, ის გააკეთონ, არსებობს მუხლი, რომლითაც, თუკი არ მოდიან საგამოძიებო კომისიაზე, სხვა საგამოძიებო უწყებები დაინტერესდებიან ამ ფაქტით და შესაბამისი გადაწყვეტილებები იქნება მიღებული”, – განაცხადა გიორგი ჩაკვეტაძემ.
საგამოძიებო კომისიასთან თანამშრომლობაზე უარის შემდეგ, მამუკა ხაზარაძე უარს ეუბნება მთავარ საგამოძიებო უწყებასაც – პარლამენტში გამოუცხადებლობის გამო, ხაზარაძე-ჯაფარიძეს მთავარი პროკურატურა იბარებს, თუმცა ლელოს ლიდერი კითხვებზე პასუხის გაცემას, როგორც თავად დაწერა სოციალურ ქსელში, მხოლოდ მოსამართლის თანდასწრებით აპირებს.
მამუკა ხაზარაძის წინააღმდეგ საქმე სისხლის სამართლის 349-ე მუხლით უკვე აღიძრა, რაც „დროებითი საგამოძიებო კომისიის მოთხოვნის შეუსრულებლობის” გამო ჯარიმას ან ერთ წლამდე პატიმრობას ითვალისწინებს. იგივე მუხლით ელის პასუხისგება ხაზარაძის პარტნიორ ბადრი ჯაფარიძესაც. „ლელოს“ ლიდერები სხდომაზე მას შემდეგ დაიბარეს, როცა ნავთობკომპანია „მაგნატის“ საქმე განიხილეს. ბიზნესმენმა ჯემალ ლეონიძემ გაიხსენა, თუ რა როლი ჰქონდათ მისთვის ბიზნესის წართმევასა და კეზერაშვილისთვის გადაცემაში, სწორედ ხაზარაძე-ჯაფარიძეს.