გიორგი ქოჩორაშვილის შეძენა გლაზგოს „სელტიკსაც“ სურდა, რამაც აიძულა ლისაბონის „სპორტინგი“ სატრანსფერო გარიგება დაგეგმილზე ადრე დაესრულებინა – ამის შესახებ ესპანური გამოცემა Super Deporte წერს.
„საქართველოს ნაკრების ნახევარმცველის, გიორგი ქოჩორაშვილის ტრანსფერით შოტლანდიის ჩემპიონი „სელტიკიც“ გახლდათ დაინტერესებული. „სპორტინგი“ „ლევანტესთან“ უკვე შეთანხმებული იყო, მაგრამ უფრო დაბალ ფასად. საბოლოოდ, პორტუგალიელებმა ესპანელებს 5,5 მილიონი ევრო გადაუხადეს, ვალენსიელები ბონუსების სახით კიდევ ორ მილიონ ევროს მიიღებენ.
„სელტიკის“ მესვეურებმა „ლევანტეს“ წინადადებით 29 მარტს მიმართეს, ამან კი ლისაბონის „სპორტინგი“ აიძულა, გარიგებაში იმაზე მეტი დაეხარჯა, ვიდრე თავდაპირველად ჰქონდათ დაგეგმილი.
საყრდენი ნახევარმცველის შეძენით „სელტიკის“ მთავარი მწვრთნელი, ბრენდან როჯერსი იყო დაინტრესებული. თავის მხრივ, „სპორტინგს“ გიორგი ქოჩორაშვილთან დაკავშირებით სერიოზული განზრახვა ჰქონდა, სწორედ ამის გამო დაჩქარდა გარიგება და მხარეებმა ტრანსფერი ოფიციალურად გამოაცხადეს“, – აღნიშნულია ესპანური გამოცემის სტატიაში.