რუსთავში კიდევ ერთი მასშტაბური პროექტი – მოდებაძის ქუჩის რეაბილიტაცია მიმდინარეობს. ქალაქის მერი ნინო ლაცაბიძე, საქართველოს პარლამენტში რუსთავის დელეგატ ირაკლი შატაკიშვილთან ერთად, ინფრასტრუქტურული პროექტის მიმდინარეობას, სამუშაო ფორმატში ადგილზე გაეცნო.
,,საქართველოს პრემიერ მინისტრის ირაკლი კობახიძის მხარდაჭერით, რუსთავის გუნდი ჩვენი ქალაქისთვის კიდევ ერთ მნიშვნელოვან პროექტს ვახორციელებთ. მოდებაძის ქუჩის რეაბილიტაციის დასრულების შემდეგ, ჩვენ შევძლებთ მუნიციპალური ტრანსპორტით მომსახურების გაუმჯობესებას. 32 ათას კვადრატულ მეტრზე მოეწყობა სრულიად ახალი საგზაო ინფრასტრუქტურა, რაც გულისხმობს როგორც სატრანსპორტო გზის მოწყობას, ასევე საფეხმავლო და მწვანე ზონების განვითარებას. ეს პროექტი ჩვენი ქალაქის ურბანული განვითარებისთვის მნიშვნელოვანია, როგორც ვიზუალური, ასევე სატრანსპორტო სისტემის გაუმჯობესების მხრივ”, – განაცხადა რუსთავის მერმა ნინო ლაცაბიძემ.
სატრანსპორტო კუთხით, ერთ-ერთი ყველაზე დატვირთული გზის – მოდებაძის ქუჩის სარეაბილიტაციო ტერიტორია 32 000 კვადრატული მეტრია. საავტომობილო გზა კი 21 000 კვადრატულ მეტრზე განახლდება და ექსპლუატაციის ვადის მაქსიმალურად გაზრდის მიზნით, ასფალტის სამფენიანი საფარი მოეწყობა.
,,მოდებაძის ქუჩა რუსთავისთვის ერთ-ერთი მნიშვნელოვანი სატრანსპორტო კვანძია, განსაკუთრებით ამ პირობებში, როდესაც ტერიტორიის ინტენსიური განაშენიანება მიმდინარეობს. პროექტის დასრულების შემდეგ კი ჩვენ მივიღებთ ევროპული სტანდარტის სატრანსპორტო ინფრასტრუქტურას”, – განაცხადა საქართველოს პარლამენტში რუსთავის დელეგატმა ირაკლი შატაკიშვილმა.
პროექტის თანახმად, მოდებაძის ქუჩაზე ტროტუარების, ველობილიკების, მწვანე არეალების, სარწყავი და სანიაღვრე ქსელის, ახალი გარე განათების სისტემის მოწყობაა გათვალისწინებული. დამონტაჟდება გარე განათების 70 ახალი ბოძი და 6 ლოკაციაზე საზოგადოებრივი ტრანსპორტის მოსაცდელები მოეწყობა.
ინფრასტრუქტურული პროექტის ღირებულება 6 101 101 ლარია და სრულად სახელმწიფო ბიუჯეტიდან ფინანსდება.