უნგრეთში კონსერვატიული პოლიტიკური მოქმედების კონფერენცია ოფიციალურად ხვალ დაიწყება, რომელიც ვიქტორ ორბანის სიტყვით გაიხსნება. უკვე მეოთხე წელია, რაც უნგრეთი აღნიშნულ კონფერენციას მასპინძლობს.
ბუდაპეშტში დელეგაციასთან ერთად იმყოფება საქართველოს პრემიერ-მინისტრი, ირაკლი კობახიძე, რომელიც კონფერენციაზე სიტყვით გამოვა. უნგრეთში იმყოფებიან ასევე საქართველოს საგარეო საქმეთა მინისტრი მაკა ბოჭორიშვილი და მთავრობის ადმინისტრაციის ხელმძღვანელი ლევან ჟორჟოლიანი.
მაკა ბოჭორიშვილმა აღნიშნა, რომ ეს ერთ-ერთი მნიშვნელოვანი კონფერენციაა ევროპაში, რომელშიც საქართველო ტრადიციულად წელსაც მონაწილეობს.
“საქართველო ტრადიციულად მონაწილეობს ამ ღონისძიებაში. ეს არის ერთ-ერთი უმნიშვნელოვანესი კონფერენცია ევროპაში. განსაკუთრებით გამოხატული თანხვედრით ამერიკის შეერთებული შტატების ახალ ადმინისტრაციასთან, იმ პოლიტიკასთან, რასაც ამერიკის შეერთებული შტატების ახალი ადმინისტრაცია ატარებს. ამ თვალსაზრისით, სწორედ ეს ხაზი ევროპაში არის ერთ-ერთი უმნიშვნელოვანესი პლატფორმა, სწორედ იმ ფასეულობების გასაჟღერებლად და გასაძლიერებლად, რასაც ემსახურება სწორედ კონსერვატიული მიმართულებები, რაც ჩვენი საზოგადოებისთვის ასევე ძალიან მნიშვნელოვანია. დღეს ევროპაში არის ნამდვილად ის გამოწვევები, რომელიც უკავშირდება სწორედ ამ ფასეულობების დაცვას და აქედან გამომდინარე, ეს არის ერთ-ერთი მნიშვნელოვანი პლატფორმა, რომელსაც საქართველოც იყენებს აქტიურად”, – აცხადებს მაკა ბოჭორიშვილი.
საქართველოს პრემიერ-მინისტრი ირაკლი კობახიძე უნგრეთის პრემიერ-მინისტრ ვიქტორ ორბანს უკვე შეხვდა