ჩვენს მოქალაქეებთან ერთად ვამაყობთ ქართული პოლიციით, თითოეული გმირი პოლიციელით, დარწმუნებული ვარ, მომავალშიც შეინარჩუნებთ უმაღლეს სტანდარტებს და კვლავ იქნებით ჩვენი ქვეყნის უსაფრთხოებისა და სამართლიანობის საიმედო საყრდენი, – ამის შესახებ საქართველოს პრემიერ-მინისტრმა ირაკლი კობახიძემ პოლიციელის დღისადმი მიძღვნილ საზეიმო ღონისძიებაზე სიტყვით გამოსვლისას განაცხადა.
მთავრობის მეთაურმა პოლიციელებსა და საქართველოს შინაგან საქმეთა სამინისტროს თანამშრომლებს პროფესიული დღე მიულოცა და მადლობა გადაუხადა საქმისთვის, რომელსაც ისინი ყოველდღიურად აკეთებენ ქვეყნის უსაფრთხოებისა და მოქალაქეთა მშვიდობიანი ცხოვრების უზრუნველსაყოფად.
„თქვენ პირველები დგახართ კანონის სადარაჯოზე, იცავთ საზოგადოებრივ წესრიგს, ებრძვით დანაშაულს და ზრუნავთ თითოეული ჩვენგანის უსაფრთხოებაზე. ეს სამსახური, პროფესიონალიზმთან ერთად, მოითხოვს განსაკუთრებულ სიმამაცეს, ერთგულებასა და მუდმივ მზადყოფნას, რისკზე წახვიდეთ საკუთარი სიცოცხლის ფასადაც კი. თქვენი საქმიანობა ხშირად უხილავია ფართო საზოგადოებისთვის, მაგრამ მისი შედეგები – მშვიდი გარემო, დაცული მოქალაქეები, სამართლიანობის განცდა – თითოეული ჩვენგანის ყოველდღიურობაში იგრძნობა. სწორედ თქვენ მიგიძღვით ყველაზე დიდი დამსახურება იმაში, რომ დღეს საქართველო, როგორც უსაფრთხო ქვეყანა, ერთ-ერთი მოწინავეა მსოფლიო მასშტაბით“, – განაცხადა პრემიერ-მინისტრმა.
მთავრობის მეთაურმა ასევე ისაუბრა პოლიციის რეფორმაზე, რომელმაც პოლიციელს საზოგადოებრივი აღიარება, ნდობა და პატივისცემა მოუტანა.
ირაკლი კობახიძის შეფასებით, დღეს ქართული პოლიცია არსებითად ევროპულსა და ამერიკულზე მაღალი სტანდარტით მუშაობს, რაც ბოლო პერიოდის მოვლენებისას კიდევ ერთხელ მკაფიოდ დადასტურდა.
„გასული 4 წლის განმავლობაში ქართულმა პოლიციამ საქართველოს სუვერენიტეტის ხელყოფისა და ხელისუფლების გადატრიალების 4 მცდელობა აღკვეთა. კიდევ ერთხელ უნდა აღინიშნოს, რომ ძალზე მასშტაბური ძალადობის მოგერიებას არცერთი მოქალაქის ჯანმრთელობაზე რაიმე გრძელვადიანი კვალი არ დაუტოვებია“, – განაცხადა პრემიერმა და ამ მოვლენებისას გამოჩენილი პროფესიონალიზმისთვის შინაგან საქმეთა სამინისტროს ყველა შესაბამის დანაყოფს განსაკუთრებული მადლობა გადაუხადა.
ირაკლი კობახიძემ სიტყვით გამოსვლისას ხაზი გაუსვა მეხანძრე-მაშველების მნიშვნელოვან როლს მოქალაქეებზე ზრუნვის პროცესში და აღნიშნა, რომ ისინი საზოგადოებაში დიდი სიყვარულით, ნდობითა და პატივისცემით სარგებლობენ.
პრემიერ-მინისტრმა გასული წლების განმავლობაში გამოვლენილი პროფესიონალიზმისა და პატრიოტიზმისთვის კიდევ ერთხელ მადლობა გადაუხადა შინაგან საქმეთა ყოფილ მინისტრ ვახტანგ გომელაურს და ახალ მინისტრ გეკა გელაძეს წარმატებები უსურვა.
პოლიციელის დღისადმი მიძღვნილი საზეიმო ღონისძიება შინაგან საქმეთა მინისტრმა გეკა გელაძემ გახსნა. პოლიციელებს პროფესიული დღე მიულოცეს საქართველოს პრეზიდენტმა მიხეილ ყაველაშვილმა, პარლამენტის თავმჯდომარე შალვა პაპუაშვილმა და თბილისის მერმა კახა კალაძემ.
ღონისძიებას საქართველოს მთავრობისა და პარლამენტის წევრები და დიპლომატიური კორპუსის წარმომადგენლები დაესწრნენ.
