”სამწუხაროდ დღეს დაგვტოვა ვასიკო მღებრიშვილმა, ჩვენმა უერთგულესმა და უსაყვარლესმა მეგობარმა“

“პირველი არხის” ყოფილი ხელმძღვანელი და “ბრავო რეკორდსის” დამფუძნებელი ზაზა შენგელია სამწუხარო ინფორმაციას ავრცელებს.

”სამწუხაროდ, დღეს დაგვტოვა ვასიკო მღებრიშვილმა, ჩვენმა უერთგულესმა და უსაყვარლესმა მეგობარმა, თავისი საქმის ნიჭიერმა პროფესიონალმა, რომლის წვლილიც, გასული საუკუნის 90-იანების დასაწყისიდან მოყოლებული, შეუფასებელია ქართული დამოუკიდებელი ტელემაუწყებლობის დაფუძნებასა და განვითარებაში. სწორედ ვასიკოს და მისი გუნდის წყალობით გაიმართა ტექნიკურად პირველი ქართული დამოუკიდებელი ტელეკომპანიები: ”იბერვიზია”, ”რუსთავი 2”, ”თამარიონი” და მრავალი სხვა, სწორედ მან უზრუნველყო პირველად ახლადაშექმნილი ქართული კერძო სატელევიზიო მაუწყებლები ამერიკული, იაპონური და გერმანული სამონტაჟოებით, ვიდეოკამერებით, განათების ხელსაწყოებით, სარელეო გადამცემებით, მოძრავი სატელევიზიო სადგურებით, ტრანსპონდერებით, სატელიტური თეფშებითა და კასეტებით, რომელებზეც მაშინ, ახალფეხადგმულ ქართულ დამოუკიდებელ ტელეკომპანიებში მომუშავეებს, მხოლოდ ოცნება თუ შეგვეძლო… საქმის მიღმა, ის იყო ძალიან კეთილშობილი, მხიარული, კოლორიტული და საოცარი ზემოიმერული იუმორის მქონე ადამიანი, რომელსაც ყველაზე უფრო კრიტიკულ სიტუაციებშიც კი, როცა ტექნიკური პრობლემების გამო (და ასეთი სიტუაციები ხშირად მეორდებოდა ხოლმე) ყველა დაბნეულები ვიყავით და გამოსავალს ვერ ვპოულობდით ხოლმე, ვასიკო ყოველთვის ჩვეული სიდინჯით და იუმორით ძალიან იოლად ახერხებდა რაიმე გამოსავლის პოვნას, ყოველთვის მისი იმედი გვქონდა და ის უკლებლივ ყოველ ჯერზე გვეხმარებოდა, გვშველოდა… ვერც კი მოვთვლი რამდენჯერ ”გადაურჩენია” მას სხვადასხვა სატელევიზიო ეთერები ტექნიკური კოლაფსისაგან. ვასიკო მღებრიშვილი იყო ყოველმხრივ პოზიტიური პიროვნება და ღმერთის დიდი საჩუქარი ყველა ჩვენთაგანის ყოველდღიურ საქმიანობაშიც და ცხოვრებაშიც. დიდი მადლობა მას ყველაფრისათვის, ღმერთმა ნათელში ამყოფოს მისი სული. ჩემო ხატია Khatia Mghebrishvili , შენ ყოველთვის ამაყი იქნები ჩვენი ვასიკოთი – შენი საოცარი მამით. ❤❤❤”