წლევანდელი პროგნოზი ასე გამოიყურება – 8 მილიონი საერთაშორისო მოგზაური, რაც გასულ წელთან შედარებით 7%-ით გადაჭარბება იქნება, – განაცხადა გადაცემა „დღის ქრონიკაში“ ტურიზმის ეროვნული ადმინისტრაციის ხელმძღვანელმა მაია ომიაძემ.
მისივე თქმით, შემოსავლებში ეს იქნება 4,7 მილიარდი ამერიკული დოლარი, რაც 8%-ით გადაჭარბება იქნება გასულ წელთან შედარებით.
„ზაფხულის სეზონი, შეიძლება ითქვას, შუა პერიოდშია, საკმაოდ წარმატებულად დაიწყო. პროგნოზები ძალიან პოზიტიური გვაქვს. ზაფხულის კვარტლის ბოლოს გვეცოდინება უკვე როგორი იქნება იმიტომ, რომ წინასწარ მსჯელობას ციფრების გარეშე აზრი არ აქვს, თუმცაღა, მოლოდინები ძალიან პოზიტიურია.
რაც შეეხება წლის დასაწყისს, უნდა აღინიშნოს, რომ აქაც, წინა წელთან შედარებით, ანალოგიურ პერიოდთან შედარებით ზრდა გვაქვს ვიზიტორების ოდენობაში, ხოლო შემოსავლებში გადაჭარბებული რაოდენობით, უპრეცედენტო რაოდენობით შემოსავალი მიიღო ქვეყანამ ტურიზმის ინდუსტრიიდან.
მოლოდინებს რაც შეეხება, ჩვენ ყოველ წელს ვაკეთებთ შემდეგი წლის პროგნოზს სავარაუდო დაშვებებით. უნდა აღინიშნოს, რომ წლევანდელი პროგნოზი ასე გამოიყურება – 8 მილიონი საერთაშორისო მოგზაური, რაც გასულ წელთან შედარებით 7%-ით გადაჭარბება იქნება, ხოლო შემოსავლებში ეს იქნება 4,7 მილიარდი ამერიკული დოლარი, რაც 8%-ით გადაჭარბება იქნება გასულ წელთან შედარებით. მთლიანობაში, სტატისტიკის თვალსაზრისით საკმაოდ პოზიტიურ ციფრებს ველოდებით. აღსანიშნავია ის ფაქტი, რომ წელს ძალიან ბევრი ახალი ფრენა დაემატა, ახალი მიმართულება, რაც, რა თქმა უნდა, წინაპირობაა იმის, რომ საქართველოში ბევრად მეტი საერთაშორისო მოგზაური ჩამოვიდეს“, – აღნიშნა მაია ომიაძემ.