ჩვენს სამიზნე ბაზრებზე ძალიან აქტიურად გვაქვს კამპანიები, – განაცხადა გადაცემა „დღის ქრონიკაში“ ტურიზმის ეროვნული ადმინისტრაციის ხელმძღვანელმა მაია ომიაძემ.
მისი განმარტებით, იგულისხმება ევროკავშირის ქვეყნები.
„აქტიური კამპანია გვაქვს გერმანიაში, პოლონეთში, საფრანგეთში, იტალიაში, ბალტიის ქვეყნებში. ასევე აღსანიშნავია დიდი ბრიტანეთი, ჩინეთი, ინდოეთი, გაერთიანებული ემირატები. შესაბამისად, თუ მივადევნებთ თვალყურს, რომ ფრენებთან მიმართებაში ასევე ემატება ერთობლივი კამპანიები ავიაკომპანიებთან ერთად, როგორც ციფრულ მედიაში, ისე ტრადიციულ მედიაში. ასევე გვაქვს გამოფენები, სადაც ქვეყნის პრეზენტაციას ვუტარებთ სხვადასხვა ტიპის მედია იქნება ეს თუ სექტორი. ვფიქრობთ, რომ ეს ყველაფერი, თანმიმდევრული გეგმა საბოლოო ჯამში შედეგს გამოიღებს.
ყოველ შემთხვევაში, აქამდე კოვიდის შემდეგ აღდგენის მიმდინარეობა აბსოლუტურად სწორი დინამიკით მიდის ტურისტების თვალსაზრისით, ხოლო შემოსავლებში ბოლო პერიოდია, რამდენიმე წელია, მუდმივად გადაჭარბებაა, რაც სწორედ იმაზე მეტყველებს, რომ ბევრად მეტი მაღალ მხარჯველუნარიანი მოგზაური ჩამოდის საქართველოში. რა თქმა უნდა, კამპანიები გვაქვს ქვეყნებისა და სეზონების მიხედვით, ასევე პროდუქტების მიხედვით. პირობითად ვამბობ, ვიცით გერმანელ მოგზაურს ზაფხულის განმავლობაში საქართველოში რა აქტივობები აინტერესებს. ჩვენ საკმაოდ ადრე დავიწყეთ ზაფხულის პოპულარიზაცია, ზაფხულის აქტივობების, მთის, სათავგადასავლო ტურიზმის პოპულარიზაცია ევროპის ქვეყნებში და ვფიქრობთ, რომ სწორედ ამის შედეგია საკმაოდ ბევრი მოგზაური. ჩვენ ასევე ვაკეთებთ მუდმივ გამოკითხვას, როდესაც საქართველოდან მოგზაური გადის“, – აღნიშნა მაია ომიაძემ.