“ვერ გავჩუმდები – უდიდესი მადლიერების გრძნობით, მოვითხოვ სათანადოდ დაფასდეს გმირი პოლიციელის თავდადება”

ლევან ლორთქიფანიძე სოციალურ ქსელში პოსტს აქვეყნებს.

”შსს-ს მინისტრს
შსს დიდუბის პოლიციის ხელმძღვანელს

უფალმა იცის- რასაც ახლა მოგახსენებთ, სრული სიმართლეა- შეულამაზებელი და გადაჭარბების გარეშე.
3-4 დღის წინ მანქანით ვმოძრაობდი წერეთლის გამზირზე. დიდუბის პოლიციის წინ ძრავა გაითიშა.
მანქანიდან გადმოვედი, “კაპოტი” ავხადე და…
ძრავის უკანა მხარეს, სიგანეში 30- 40 სმ და სიმაღლით ნახევარ მეტრამდე ცეცხლი გიზგიზებს!
პოლიციის განყოფილებაში ყვირილით შევვარდი- ჩქარა, მანქანაში გაზის ბალონია და იწვის!
მყისიერად, ვეფხვივით წამოვარდა ახალგაზრდა პოლიციელი, დიდი წყლის ბოთლით ხელში. ბოთლის გამორთმევა მინდოდა, მაგრამ არ დამანება, ერთად მივირბინეთ ცუცხლმოკიდებულ მანქანასთან და თავად ჩააქრო. მანქანა ჭირსაც წაუღია- საკუთარი სიცოცხლით გარისკა და მარტო მე კი არა- იქვე, ავტობუსის გაჩერებაზე მყოფი 6- 7 მოქალაქეც გადაარჩინა.
მანქანის შეკეთების დროს გაოცებულმა ხელოსნებმა მითხრეს- ვერ წარმოგვიდგენია, როგორ არ აფეთქდა- ღმერთს ყვარებიხარო…
საკუთარი სიცოცხლე არაფრად ჩააგდო და ასე გვიხსნა მამუკა ხიზანეიშვილმა გარდაუვალი დაღუპვისგან!
მე გახლავართ სამი შვილის მამა, შვიდი შვილიშვილის პაპა და ორი შვილთაშვილის დიდი პაპა,საქართველოს ტერიტორიული მთლიანობისთვის წარმოებული ომის ვეტერანი, ვახტანგ გორგასლის სახელობის ორდენის კავალერი, ოთხი სამედიცინო ლიცენზიის მფლობელი, წარსულში- ქირურგი, ამჟამად- პენსიონერი მწერალი/ შვიდი წიგნის ავტორი./ სამოცდაცხრა წლის კაცმა კარგად ვიცი გმირობის ფასი და ლაჩრებიც მინახავს…
ამას იმიტომ ვწერ, რომ კი არ გთხოვთ- მოგიწოდებთ შსს-ს ხელმძღვანელობას, სათანადოდ დააფასოთ გმირი პოლიციელის, კარგი ქართველი კაცის, მამუკა ხიზანეიშვილის თავდადება.
P.S. მამუკა შეიძლება გამინაწყენდეს. როცა გავესაუბრე, მივხვდი, რომ თავად ამ შემთხვევაზე კრინტს არ დაძრავდა, მაგრამ მე ვერ გავჩუმდები- უდიდესი მადლიერების გრძნობით, მოვითხოვ სათანადოდ დაფასდეს გმირი პოლიციელის თავდადება!

პატვისცემით
ლევან ლორთქიფანიძე”