იტალიის პრემიერ-მინისტრის, ჯორჯია მელონის განცხადებით, რუსეთის გეგმა, უკრაინაში მშვიდობიანი მოქალაქეები დაეშინებინა, ჩაიშალა, მიუხედავად იმისა, რომ მოსკოვი ცდილობს, უკრაინაში სამოქალაქო ინფრასტრუქტურა გაანადგუროს.
ამის შესახებ ჯორჯია მელონიმ რომში განაცხადა, სადაც დღეს უკრაინის რეკონსტრუქციის კონფერენეცია იმართება.
იტალიის პრემიერის თქმით, მნიშვნელოვანია არა მხოლოდ უკრაინის დახმარება თავდაცვაში, არამედ აუცილებელია იმის აღდგენა, რაც დანგრეულია და იტალია ამაში საკუთარ როლს შეასრულებს.
„რუსეთი აძლიერებს ქმედებებს, რომლებიც მიმართულია სამოქალაქო საზოგადოების წინააღმდეგ. ახორციელებს დარტყმებს ინფრასტრუქტურაზე, რომელიც სასიცოცხლოდ მნიშვნელოვანია მოსახლეობისთვის, რადგანაც სწორედ ეს იყო რუსეთის მიზანი თავიდანვე. ის ცდილობს, წყვდიადი, შიმშილი და შიში მიიტანოს უკრაინაში. მისი ეს გეგმა ჩაიშალა, ისევე როგორც სხვა გეგმები“, – განაცხადა იტალიის პრემიერ-მინისტრმა.
ჯორჯია მელონის განცხადებით, საერთაშორისო თანამეგობრობა გაერთიანდა რუსეთის გეგმების წინააღმდეგ და სასწრაფო მხარდაჭერა გაუწია კიევს, რათა ქვეყანაში სასიცოცხლოდ მნიშვნელოვანი სამსახურები სათანადოდ ფუნქციონირებდნენ.
ცნობისთვის, რომში დღეს უკრაინის რეკონსტრუქციის რიგით მეოთხე კონფერენცია იმართება.