უკრაინის პრეზიდენტი ვოლიდიმირ ზელენსკი იმედოვნებს, რომ აშშ-სა და ევროკავშირში მალე მოიხსნება ყველა ბარიერი რუსეთის წინააღმდეგ ახალი სანქციების დასაწესებლად.
უკრაინის პრეზიდენტის განცხადებით, ამ საკითხს სენატორ ლინდსი გრემთან და რიჩარდ ბლუმენტალთან შეხვედრაზე განიხილავს, რომელიც რომში შედგება.
„ველოდები შეხვედრას ამერიკელ კოლეგებთან სანქციების შესახებ. ვფიქრობ, ძალიან ახლოს ვართ”, – განაცხადა ზელენსკიმ.
ამასთან, ვოლოდიმირ ზელენსკიმ გააკრიტიკა ევროკავშირი სანქციების ახალი პაკეტის დამტკიცების შენელების გამო, თუმცა აღნიშნა, რომ მიიღო ევროკავშირისგან დაპირება სანქციების დამტკიცებასთან დაკავშირებით.
„ევროპა იღებს თავის თავზე ამ ვალდებულებებს“, – განაცხადა უკრაინის პრეზიდენტმა.
ზელენსკის თქმით, აშშ-ის წარმომადგენლების მონაწილეობა „მსურველთა კოალიციის” შეხვედრაში მნიშვნელოვანი პოლიტიკური სიგნალია პრეზიდენტ ტრამპისგან.
ცნობისთვის, „მსურველთა კოალიციის“ შეხვედრას ესწრებოდნენ ბრიტანეთის პრემიერ-მინისტრი კირ სტარმერი და საფრანგეთის პრეზიდენტი ემანუელ მაკრონი. უკრაინის პრეზიდენტი ვოლოდიმირ ზელენსკი, იტალიის პრემიერ-მინისტრი ჯორჯია მელონი და სხვა ლიდერები შეხვედრას ონლაინრეჟიმში რომიდან შეუერთდნენ, სადაც უკრაინის რეკონსტრუქციის კონფერენცია მიმდინარეობს. შეხვედრას პირველად შეუერთდნენ შეერთებული შტატების წარმომადგენლები, მათ შორის პრეზიდენტის სპეციალური წარმომადგენელი, გენერალი კიტ კელოგი, სენატორი ლინდსი გრეჰემი და სენატორი რიჩარდ ბლუმენტალი. ეს ლიდერების დონეზე „მსურველთა კოალიციის“ უკვე მეექვსე შეხვედრაა.