გარედან, უპირობოდ დავალებების შემსრულებელი ხელისუფალი როცა ხარ, ერთ პატარა თვითნებობასაც არ გპატიობენ და ფაქტია, უკრაინის ხელისუფლების და ლიდერების თავსდამტყდარი კრიტიკის ტალღა სწორედ ამას უკავშირდება, – განაცხადა „დღის ქრონიკაში“ საქართველოს პარლამენტის ვიცე-სპიკერმა, ნინო წილოსანმა, რითაც გამოეხმაურა უკრაინის უმაღლესი რადის მიერ ანტიკორუფციული სამსახურის შესახებ მიღებულ კანონს, რომელიც ევრობიუროკრატებმა გააკრიტიკეს.
„ქვეყანას, რომელიც ომშია ჩართული და დასავლეთის პოლიტიკოსების თქმითვე, სხვების ხარჯზე ღვრიან უკრაინელების სისხლს, არ პატიობენ ერთ პატარა, შიდა სტრუქტურულ გადაწყვეტილებასაც კი და ხდება ის, რასაც ვუყურებთ: უმაღლესი თანამდებობის პირები გამოდიან, აკრიტიკებენ ზელენსკის და მის თანაგუნდელებს.
ვნახოთ, როგორ განვითარდება პროცესები, ამ კრიტიკის ტალღას როგორ გაუძლებს უკრაინის პრეზიდენტი, ომში მყოფი ქვეყანა, რომელიც სამწუხაროდ ამ დიდი შეტევებისა და კრიტიკის ქარცეცხლში მოექცა“, – აღნიშნა ნინო წილოსანმა.
უკრაინის პარლამენტმა გუშინ მხარი დაუჭირა კანონპროექტს, რომლის მიხედვითაც, კორუფციასთან ბრძოლის ეროვნული ბიურო და კორუფციის წინააღმდეგ ბრძოლის სპეციალიზებული პროკურატურა გენერალური პროკურორის გადაწყვეტილებებზე დამოკიდებული ხდება. მანამდე ეს უწყებები დამოუკიდებელი ანტიკორუფციული ინსტიტუტები იყო. უკრაინის პრეზიდენტმა, ვოლოდიმირ ზელენსკიმ კანონს ხელი უკვე მოაწერა, რასაც კიევში საპროტესტო გამოსვლები მოჰყვა. პრეზიდენტის ეს გადაწყვეტილება ევრობიუროკრატიამაც გააკრიტიკა.