5 სექტემბერს, ლატვიის ეროვნულმა შეიარაღებულმა ძალებმა (NBS) გაავრცელა განცხადება, რომ კანადელი ჯარისკაცი ლატვიაში უგზო-უკვლოდ გაუჩინარდა.
NBS-ის ცნობით, „კანადის შეიარაღებული ძალების ერთობლივი ოპერაციების სარდლობა ადასტურებს, რომ ლატვიაში მყოფი კანადის შეიარაღებული ძალების ჯარისკაცი გაუჩინარდა და მისი ძებნა გრძელდება”.
ინფორმაციაში არ სახელდება ჯარისკაცის ვინაობა, ქვედანაყოფი ან ბოლო ადგილსამყოფელი, ასევე გაუჩინარების გარემოებები.
„გამოძიებას, მაქსიმალური მხარდაჭერით და ყველა არსებული რესურსის გამოყენებით, აწარმოებს ლატვიის სახელმწიფო პოლიცია, კანადის შეიარაღებული ძალების სამხედრო პოლიციასთან, ლატვიაში ნატო-ს მრავალეროვნულ ბრიგადასთან და ეროვნულ შეიარაღებულ ძალებთან თანამშრომლობის ფარგლებში“, – ნათქვამია განცხადებაში.
მასში ასევე აღნიშნულია, რომ ჯარისკაცის ოჯახი მომხდარის შესახებ ინფორმირებულია. „ოჯახის პირადი ცხოვრების პატივისცემისა და გამოძიებაში ჩარევის თავიდან აცილების მიზნით, ამ ეტაპზე დამატებითი დეტალები არ იქნება მოწოდებული“, – განმარტავს NBS.
კანადამ „ოპერაცია დამშვიდება“ (Operation REASSURANCE) 2014 წელს, უკრაინაში რუსეთის პირველი შეჭრის შემდეგ დაიწყო. ათ წელზე მეტი ხნის შემდეგ, ის, დაახლოებით 2,000 ჯარისკაცით, კვლავ რჩება კანადის შეიარაღებული ძალების უდიდეს საზღვარგარეთულ მისიად, რომლებიც ლატვიაში საერთაშორისო ბრიგადას რუსული აგრესიის შესაკავებლად და ნატო-ს ტერიტორიის დასაცავად ხელმძღვანელობენ.