ოფიციალური მონაცემები ადასტურებს, რომ ივლისში ბრიტანეთის ეკონომიკამ სტაგნაცია განიცადა, რითაც პრემიერ-მინისტრ კირ სტარმერის ლეიბორისტულ მთავრობას, ისედაც არასტაბილური კვირის ბოლოს, კიდევ ერთი დარტყმა მიადგა. სტატისტიკის ეროვნული სამსახურის განცხადებით, ივნისში მთლიანი შიდა პროდუქტის 0.4%-ით ზრდის შემდეგ, ივლისის თვეში ეს მონაცემი აღარ შეცვლილა. გასულ კვირას ბრიტანეთის მთავრობას ორი მაღალი რანგის თანამდებობის პირი გამოაკლდა. პირველი იყო სტარმერის მოადგილე ანჯელა რეინერი, რომელმაც თანამდებობა ქონების გადასახადის არასრულად გადახდის გამო დატოვა. ხუთშაბათს კი პრემიერმა დიდი ბრიტანეთის ელჩი ვაშინგტონში, პიტერ მანდელსონი მას შემდეგ დაითხოვა, რაც სექსუალურ მოძალადე ჯეფრი ეპშტეინთან მის დანაშაულებრივ კავშირზე ახალი ინფორმაცია გავრცელდა.
მთავრობამ ეკონომიკური ზრდის სირთულეები აღიარა, მიუხედავად იმისა, რომ ივლისის მშპ-ის მაჩვენებელი საბაზრო მოლოდინების შესაბამისი იყო. „ვიცით, რომ ზრდის გასაძლიერებლად მეტი უნდა გავაკეთოთ, რადგან, იმის მიუხედავად, რომ ჩვენი ეკონომიკა მოშლილი არ არის, ის სტაგნაციას მაინც განიცდის“, – ნათქვამია ხაზინის წარმომადგენლის განცხადებაში. უახლესმა მონაცემებმა აჩვენა, რომ წარმოების 1.3%-იანმა ვარდნამ მომსახურებისა და მშენებლობის სექტორების ზრდა გადაწონა. „მშპ-ის სტაგნაცია ივლისში აჩვენებს, რომ ეკონომიკა ჯერ კიდევ ცდილობს, მიიღოს ის იმპულსი, რომელიც წინა ეტაპზე გადასახადების გაზრდით და სამომავლოდ ბიუჯეტში გადასახადების სავარაუდო დამატებითი ზრდით არის განპირობებული“, – მიიჩნევს კვლევითი ჯგუფის, „კაპიტალ ეკონომიკსის“ მთავარი ეკონომისტი, პოლ დეილსი.
https://www.afp.com/en/agency/our-commitments/afp-charters