ინდოეთში საქართველოს ტურიზმის ეროვნული ადმინისტრაციის მარკეტინგული კამპანიის ფარგლებში, ქართული ტურისტული კომპანიების წარმომადგენლებს საშუალება ჰქონდათ შეხვედრები გაემართათ ინდოეთის მსხვილი ტურისტული, ღონისძიებებისა და ქორწილების დამგეგმავი კომპანიების წარმომადგენლებთან საქართველოში ერთობლივი ტურების დასაგეგმად, მსხვილი, ბიზნეს ტურისტული ჯგუფების ჩამოყვანისა და ღონისძიებების მოწყობის მიზნით.
შეხვედრის შესახებ საუბრობს ტურისტული კომპანიის Georgian Travel Group-ის წარმომადგენელი თამუნა კურტანიძე.
„ინდოეთში შეხვედრაზე საკმაოდ ბევრი ადგილობრივი სააგენტო იყო წარმოდგენილი, სერიოზული სააგენტოები, რომლებიც უკვე მუშაობენ საქართველოს მიმართულებაზე. ინდოეთში გამართული ღონისძიებების შემდეგ იმედი გვაქვს უფრო მეტი მოგზაური ჩამოვა საქართველოში. ინდოეთის მხრიდან საქართველოთი დაინტერესება ძალიან დიდია. ჩვენ გვქონდა როგორც ინდივიდუალური ტურები, ასევე ჩამოყვანილი გვყავდა ჯგუფები. საქმიანი ტურიზმის ფარგლებში 400 კაციანი ჯგუფი გვყავდა აგვისტოში. ეს არის საინტერესო და მზარდი ბაზარი“, – აცხადებს თამუნა კურტანიძე.
ტურიზმის ეროვნული ადმინისტრაცია ინდოეთის 4 ქალაქში მასშტაბურ მარკეტინგულ კამპანიას ატარებს. დელისა და მუმბაიში პრეზენტაციები გაიმართა. ბენგალურსა და აჰმედაბადში კი შეხვედრები შედგა ინდურ კომპანიებთან სამომავლო თანამშრომლობის მიზნით.