სამშაბათს, 16 სექტემბერს, მას შემდეგ, რაც შეუძლოდ გახდა, ბრაზილიის ყოფილი პრეზიდენტი, ჟაირ ბოლსონარუ დედაქალაქ ბრაზილიის საავადმყოფოში გადაიყვანეს. ეს ინფორმაცია მისმა შვილმა, ფლავიო ბოლსონარუმ გაავრცელა.
2018 წლის საპრეზიდენტო კამპანიის დროს დანით მიყენებული ჭრილობის შემდეგ, ჟაირ ბოლსონარუს ხელახლა შეექმნა ნაწლავებზე პრობლემები.
ამ პრობლემებიდან გამომდინარე, მას უკვე, სულ მცირე, ექვსი ოპერაცია აქვს გაკეთებული. მათ შორის ბოლო, 12-საათიანი პროცედურით, აპრილში ჩაუტარდა.
სოციალურ ქსელ X-ზე ფლავიო ბოლსონარუმ დაწერა, რომ მამამისს ძლიერი სლოკინი, ღებინება და დაბალი არტერიული წნევა ჰქონდა.
ფლავიო განმარტავს, რომ „რადგან ეს გადაუდებელი შემთხვევა“ იყო, 70 წლის ჟაირ ბოლსონარუ საავადმყოფოში „კრიმინალური პოლიციის ოფიცრების თანხლებით გადაიყვანეს, რომლებიც ქალაქ ბრაზილიაში მის სახლს იცავენ“.
ყოფილი პრეზიდენტი აგვისტოს დასაწყისიდან შინაპატიმრობაში იმყოფება.
კვირას, ყოფილმა პრეზიდენტმა ბრაზილიაში სხვადასხვა სამედიცინო პროცედურა ჩაიტარა, მათ შორის – ლაბორატორიული ანალიზები და კანის დაზიანებების ქირურგიული მოცილება.
გასულ კვირას, ბრაზილიის უზენაესმა სასამართლომ ყოფილ პრეზიდენტს, 2022 წლის არჩევნებში დამარცხების შემდეგ სახელმწიფო გადატრიალების დაგეგმვისთვის, 27 წლითა და 3 თვით თავისუფლების აღკვეთა მიუსაჯა.