გერმანიის ყველაზე დიდი დევნილთა ბანაკი ნელ-ნელა იცლება. ბერლინის ტეგელის ყოფილი აეროპორტის ტერიტორიაზე მოწყობილ ბანაკში, ბოლო სამწელიწადნახევრის განმავლობაში, 120 000-ზე მეტი ადამიანი, ძირითადად უკრაინელები, იმყოფებოდა. ახალჩამოსულთა ნაკადი დღეისთვის საგრძნობლად შემცირდა. ტეგელის ყოფილი აეროპორტის ტერიტორია ბოლო ბინადრებმანოემბრის ბოლომდე უნდა დატოვონ.
„ეს ოაზისია“, – ამბობს ანატოლი გერმანიის დედაქალაქის ჩრდილოეთით მდებარე ბანაკზე, სადაც ორი წელი და ცხრა თვეა ცხოვრობს. ის თითქმის ყოველდღე დადის სამკერვალო სახელოსნოში და ქსოვილების ნარჩენებისგან კოსმეტიკისთვის ჩანთებს და სხვა ნივთებს ამზადებს. თუმცა, ყველაზე მეტად ოდესაში დაბრუნება სურს, სადაც გემზე მუშაობდა და რომლის კაპიტანი, მისი თქმით, დღემდე ელოდება. ომის გამო, ეს ჯერ შეუძლებელია, მაგრამ ტეგელის დატოვება მაინც უწევს. რას გააკეთებს მომავალში, წარმოდგენა არ აქვს.
დევნილთა ბანაკი, თავდაპირველად, ახალჩამოსულთათვის სატრანზიტო პუნქტს წარმოადგენდა. ეს იყო ადგილი, სადაც ისვენებდნენ და ადმინისტრაციულ საკითხებს აგვარებდნენ. თუმცა, საბოლოოდ, ის ბევრისთვის გრძელვადიან სახლად იქცა – ოფიციალური პროცედურები ჭიანურდება, ალტერნატიული საცხოვრებლის პოვნა კი ძალიან ძნელია. თუმცა, მარინა კნიაზევას და მის მეგობრებს გაუმართლათ – ისინი ბერლინში, ბინაში გადადიან.
„პატარა ჯგუფი ვართ, ყველანი 50 წელზე მეტი ასაკის. მარტო ვართ, არც ცხოველები გვყავს, არც ბავშვები. ასე რომ, ჩვენ ერთგვარი საერთო ოჯახი შევქმენით“, – ამბობს კნიაზევა. მისი შვილი უკრაინის ფრონტზე იბრძვის. ის ძალიან ნერვიულობს მასზე. მარინა აფასებს იმ მხარდაჭერას, რომელიც ტეგელში მიიღო. თუმცა, აქ ცხოვრების პირობები არაერთხელ გამხდარა საზოგადოების კრიტიკის საგანი: მცირე ტერიტორია, ნულოვანი პირადი სივრცე, არაკვალიფიციური პერსონალი… და ეს ყველაფერი დღეში მილიონ ევროზე მეტი საოპერაციო ხარჯების ფონზე.
„ჩვენ კარგად გვესმის, რომ აქ ადამიანების განთავსების პირობები უნდა გაუმჯობესდეს“, – ამბობს დაწესებულების მენეჯერი, კლეოპატრა ტიუმლერი.
ბანაკს ბრიტანეთის მეფე ესტუმრა
სირთულეების მიუხედავად, ტეგელის ბანაკი ბერლინის მიერ გატარებული მიგრაციისა და ინტეგრაციის პოლიტიკის წარმატებად მიიჩნევა. 2023 წელს მის სანახავად ბრიტანეთის მეფე ჩარლზ III-ც კი ჩავიდა.
ამჟამად ბანაკში დაახლოებით 1 750 ადამიანი რჩება. როდესაც ის სრულად დაიცლება, კარვების ქალაქს კონტეინერების ქალაქი ჩაანაცვლებს, რომელიც დაახლოებით 2 600 ადამიანზეა გათვლილი.
ახალი ბანაკის მიზანი წინას მსგავსია: ადამიანები აქ, მაქსიმუმ, რამდენიმე დღით უნდა დარჩნენ. 2030 წლის შემდეგ ტერიტორია საუნივერსიტეტო კამპუსად გადაკეთდება. თუმცა, უკვე ნათელია, რომ აეროპორტის ტერიტორის რეკონსტრუქციას, მინიმუმ, ხუთი წელი დასჭირდება.