ვხედავთ ერთსა და იმავე სახეებს, რომლებიც წლების განმავლობაში ცდილობენ, რომ არიონ ჩვენთან სიტუაცია. ჩვენმა საზოგადოებამ ვარდისფერი სათვალეები უკვე დიდი ხანია მოიხსნა და ძალიან კარგად ხედავს, თუ რა ბუნებისა ამ ადამიანების ყალბი მხარდაჭერა ქართველების მიმართ, – განაცხადა პარლამენტის თავმჯდომარემ შალვა პაპუაშვილმა.
პაპუაშვილმა უპასუხა კითხვას – „უცხოელი აქტორები, მათ შორის მიხაილ როთი, მაია სანდუ, ანა ფოტიგა და ა.შ. სოლიდარობას უცხადებენ და ახალისებდნენ გუშინდელ აქციას. რას უპასუხებდით მათ?“
„ჩვენ ვიხილეთ კოორდინირებული საინფორმაციო მხარდაჭერა გუშინდელი სახელმწიფო გადატრიალების მცდელობისა, როდესაც ერთი მეორეზე მიყოლებით აქვეყნებდნენ მსგავს ტექსტებს საქართველოსთან დაკავშირებით. თუმცა ფაქტი იყო რომ გარკვეულად კონტექსტიდან იყო ამოვარდნილი, იმიტომ რომ ჩანდა რომ გუშინდელი სახელმწიფო გადატრიალება წარუმატებელი მცდელობა იქნებოდა, მაგრამ როგორც ჩანს იყო ტექსტები წინასწარ მომზადებული, რომელიც გარკვეული მომენტის შემდეგ დაიდო და რომელსაც უნდა შეესრულებინა მაიდნის გარე გამხნევების ფუნქცია. ვხედავთ ერთსა და იმავე სახეებს, რომლებიც წლების განმავლობაში ცდილობენ, რომ არიონ ჩვენთან სიტუაცია. ჩვენმა საზოგადოებამ ვარდისფერი სათვალეები უკვე დიდი ხანია მოიხსნა და ძალიან კარგად ხედავს, თუ რა ბუნებისა ამ ადამიანების ყალბი მხარდაჭერა ქართველების მიმართ. არანაირი ემპათია, თანაგრძნობა, ინტერესი ჩვენი ქვეყნის მშვიდობიანი განვითარების მიმართ მათ არ აქვთ. ყველანაირი საუბარი თავისუფლებაზე, დემოკრატიაზე მათი მხრიდან არის ცარიელი სიტყვები, სინამდვილეში ამის უკან დგას ძალიან ცივი გონებით გათვლილი პოლიტიკური და გეოპოლიტიკური ინტერესები საქართველოს, როგორც ტერიტორიის მიმართ და ქართველების, როგორც მხოლოდ ამ ქვეყნის მოსახლეობის მიმართ. ამიტომ გუშინდელმა დღემ ბევრი რაღაც გახადა უალტერნატივოდ ცხადი. გუშინ ყველა ამ კითხვას გაეცა პასუხი როგორც ქვეყნის შიგნით რადიკალების მხრიდან, ასევე გარეთ მათი მხარდამჭერების მხრიდან. პასუხი არის იმაში, რომ არსებობს ჯგუფი, რომელსაც საქართველოს მიმართ აქვს მავნე ინტერესები და ზუსტად ამას ვაკვირდებით ჩვენ ბოლო რამდენიმე წელია, როდესაც ცდილობენ ჩვენი ქვეყნის არევას და მის პაიკად გამოყენებას სხვადასხვა სახის გეოპოლიტიკურ თამაშში“, – აღნიშნა პაპუაშვილმა.