ახალი წესები, რომელსაც ევროკავშირი უვიზო მიმოსვლასთან დაკავშირებით ამუშავებს, საქართველოსაც ისევე ეხება, როგორც თანაბრად ეხება დანარჩენ 60 სახელმწიფოს, რომელიც ევროკავშირთან უვიზო რეჟიმით სარგებლობს, – ამის შესახებ პარლამენტის ევროინტეგრაციის კომიტეტის თავმჯდომარე ლევან მახაშვილმა განაცხადა.
მახაშვილის თქმით, ბუნებრივია, ახალი წესები საქართველოსთვისაც მნიშვნელოვანია, შეფასების პროცესი არსებითად პოლიტიკური ხდება.
„აქამდე რატომ ვერ დაადეს თითი საქართველოს? იმიტომ, რომ საქართველო პირნათლად ასრულებდა იმ კრიტერიუმებს, რაც უვიზო მიმოსვლით იყო გათვალისწინებული. უვიზო მიმოსვლის ერთ-ერთი მთავარი პრინციპი იყო, რომ ქვეყნებს ევროკავშირის უსაფრთხოებისთვის საფრთხე არ უნდა შეექმნათ. ახალი ცვლილებებით, ის პროცესი, რომელიც დღეს საკმაოდ მერიტოკრატიულია, კონკრეტული ეტაპებით და შეფასების კრიტერიუმებით, არსებითად იცვლება და ჯერ ევროკომისიის და შემდეგ ევროკავშირის წევრი ქვეყნების მხრიდან პოლიტიკური და სუბიექტური შეფასებების საგანი ხდება.
ბუნებრივია, როცა საუბარი პოლიტიკურ პროცესზე გვაქვს, წარსულში, უვიზო რეჟიმის პოლიტიკურ შანტაჟად გამოყენება უხვად ვნახეთ. ამიტომ, შეიძლება, წევრმა სახელმწიფოებმა ან ევროკომისიის ბიუროკრატებმა სცადონ, რომ ეს საკითხი პოლიტიკურ იარაღად გამოიყენონ, თუმცა ობიექტური შეფასებებით რომ გავყვეთ, ეს არ იქნება სამართლიანი, რადგან საქართველო პირნათლად ასრულებს ევროკავშირის წინაშე აღებულ ვალდებულებებს, არანაირ საფრთხეს არ უქმნის ევროკავშირს. პირიქით ეხმარება, როცა საქმე ევროკავშირის საზღვრების დაცვას, მიგრაციის კონტროლს და ორგანიზებული დანაშაულის წინააღმდეგ ბრძოლას ეხება. ობიექტური შეფასებებით, საქართველოს არანაირი პრობლემა არ ემუქრება ამ ნაწილში, მაგრამ თუ ზოგიერთმა წევრმა ქვეყანამ პოლიტიკურ იარაღად უნდა გამოიყენოს, მათგან ყველაფერია მოსალოდნელი“, – განაცხადა ლევან მახაშვილმა.