ჟურნალისტთა ფედერაციის ყოფილი ხელმძღვანელი აკაკი სიხარულიძე 67 წლის ასაკში გარდაიცვალა. ინფორმაციას სოციალურ ქსელში მისი შვილი, ირინა სიხარულიძე ავრცელებს.
აკაკი სიხარულიძემ 1982 წელს დაამთავრა თბილისის სახელმწიფო უნივერსიტეტის ჟურნალისტიკის ფაკულტეტი.
მუშაობდა საქართველოს ახალგაზრდული ორგანიზაციების ცენტრალურ აპარატში – ხელმძღვანელობდა ახალგაზრდული და საყმაწვილო ჟურნალ-გაზეთების, ტელერადიოგადაცემათა რედაქციების სექტორს; 1987 წლიდან ჟურნალისტთა ფედერაციაში (ყოფილი კავშირი) იმყოფებოდა; რედაქტორობდა გაზეთ „საქმეს“; 1994 წელს გამოსცა აფხაზეთსა და შიდა ქართლში დაღუპულთა ხსოვნისადმი მიძღვნილი წიგნი „უკვდავება“; 1993 წელს ჩამოაყალიბა ეროვნული თანხმობის დარბაზი; 1997 წელს საფუძველი ჩაუყარა ქართული ჟურნალისტიკის დღის (21 მარტი) აღნიშვნის ტრადიციას; არის ჟურნალების „ჟურნალისტისა“ და „მომხმარებლის არჩევანის“ ერთ-ერთი დამფუძნებელი; საერთაშორისო ჟურნალისტიკის, სამართლისა და ბიზნესის ინსტიტუტის დამაარსებელი, მისი რექტორი; 2013 წელს დაინიშნა საქართველოს კომუნიკაციების ეროვნული კომისიის თავმჯდომარის მოვალეობის შემსრულებლად; ეწევა საზოგადოებრივ საქმიანობას.
მედიაჰოლდინგი „ექსკლუზივ ნიუსი” აკაკი სიხარულიძის გარდაცვალების გამო მწუხარებას გამოთქვამს და კოლეგებსა და ახლობლებს სამძიმარს უცხადებს.