4 ოქტომბერი რეალურად, იყო სწორედაც რადიკალური ოპოზიციის თვითდამხობის დღე, – განაცხადა ფრაქცია „ქართული ოცნების“ წევრმა, იურიდიულ საკითხთა კომიტეტის თავმჯდომარის პირველმა მოადგილემ თორნიკე ჭეიშვილმა საქართველოს პირველი არხის გადაცემაში „დღის თემა“ სტუმრობისას.
„თუ გავიხსენებთ ზოგადად, 4 ოქტომბრამდე განვითარებულ მოვლენებს, იმ ერთგვარ პოლიტიკურ პრელუდიას, რაც წინ უსწრებდა ამ დაანონსებულ სახელმწიფო გადატრიალებას, არ გაგვიჭირდება ამოვიკითხოთ ის გზავნილები, რომელიც პირდაპირ ადასტურებდა იმას, რომ ეს შეკრება არამცდაარამც არ იქნებოდა მშვიდობიანი ხასიათის მატარებელი და პირიქით, რადიკალები ყველანაირად შეეცდებოდნენ, მაქსიმალურად მოეხდინათ სიტუაციის გამწვავება, ესკალაცია. გასაგებია, რომ ეს იყო მათი ერთადერთი ასე ვთქვათ, პოლიტიკური გამოსავალი იმ მომენტში, ვიდრე საბოლოოდ მოახდენდნენ საკუთარი თავის დასამარებას. აქვე ვიტყვი, რომ 4 ოქტომბერი რეალურად, იყო სწორედაც რადიკალური ოპოზიციის თვითდამხობის დღე. საბოლოო ჯამში, ეს დიაგნოზი შეიძლება, დაისვას“, – განაცხადა ჭეიშვილმა.
თორნიკე ჭეიშვილმა არეულობის პარალელურად ჰექსოგენის და თბილისთან ახლოს მძიმე შეიარაღების აღმოჩენის შესახებ ისაუბრა და სახელმწიფო უსაფრთხოების სამსახურსა და სხვა სამართალდამცავ ორგანოებს ეფექტიანი საქმიანობისთვის მადლობა გადაუხადა.
გადაცემის წამყვანის შეკითხვაზე, როგორ შეაფასებს აქციის ორგანიზატორთა განცხადებებს, რომ არანაირი ძალადობრივი გეგმა არ ყოფილა, ისინი სპეცრაზმისგან ფლობდნენ განსხვავებულ ინფორმაციას და რომ უღალატეს ორგანიზატორებს, თორნიკე ჭეიშვილმა აღნიშნა, რომ მათი განცხადებები ერთმნიშვნელოვნად ადასტურებდა იმას, რომ საქმე შეიძლებოდა, გვქონოდა პირდაპირ სახელმწიფო გადატრიალებასთან.
„ფაქტობრივად, ეს ყველაფერი 4 ოქტომბერს, დღის მეორე ნახევარში, როდესაც უკვე დაიწყო შეკრება ამ დაანონსებულმა აქციამ ხელისუფლების დამხობის მიზნით, მაშინვე მოხდა ამის ლუსტრაცია. დგას ხალხი თავისუფლების მოედანზე, ვისმენთ ე.წ. დეკლარაციის ტექსტს, რომელიც პირდაპირ არის ნიშნების შემცველი სახელმწიფო გადატრიალების შესახებ, ამას მოჰყვება კონკრეტული მოწოდებები და კონკრეტული ქმედებები, ამას მოჰყვება შტურმი საქართველოს პრეზიდენტის რეზიდენციაზე და მთელი კასკადი ძალადობრივი ქმედებების, რომლის დროსაც ათეულობით პოლიციელი იქნა საკმაოდ მძიმედ დაშავებული და მათ შორის, თუ არ ვცდები, ორი იყო იმდენად მძიმედ, რომ მადლობა ღმერთს, ისინი გადარჩნენ და ძალიან ცუდი შედეგი არ დადგა. რეალურად, ის, რომ ამ ხალხს, ამ ექსტრემისტული ჯგუფებს მართლაც სისხლის წყურვილი გააჩნდათ, ეს ჩვენ თუნდაც, 2024 წლის მაგალითებიდანაც შეიძლება, გავიხსენოთ, როცა პირდაპირ ჰქონდათ სახელმძღვანელოდ ერთგვარი დოკუმენტები, ასევე უცხოური სპეცსამსახურების მიერ მომზადებული. რაღაცნაირად, ეძებდნენ მსხვერპლს, ანუ, რაღაც ერთგვარი მსხვერპლშეწირვა უნდა მომხდარიყო იმისათვის, რომ მათ შემდგომში მისცემოდათ კარტბლანში და დაეწყოთ საკუთარი აბსოლუტურად ანტისახელმწიფოებრივი, ანტიკონსტიტუციური იდეების განხორციელება”, – განაცხადა ჭეიშვილმა.
თამთა სანიკიძის შეკითხვაზე, რა მტკიცებულებებს ეყრდნობა მმართველი გუნდის მძიმე ბრალდებები, რომ ცალკეული საერთაშორისო პარტნიორებისგანაც იყო წახალისებული 4 ოქტომბრის ძალადობრივი მოვლენები, თორნიკე ჭეიშვილმა განაცხადა, რომ აქ მტკიცებულება არის ყველაზე მეტად ხილული, ვიდრე ეს შეიძლება, იყოს, ვინაიდან საზოგადოებამ ვერ ნახა ვერც ერთი მკაფიო განცხადება თუნდაც, 4 ოქტომბერს, ან მეორე, თუ შემდგომ დღეებში, რომელიც გაემიჯნებოდა და დაგმობდა ხელისუფლების დამხობის მცდელობას, რაც რეალურად იყო.
„ეს ის შემთხვევაა, რომ დუმილი ამ შემთხვევაში, ფაქტობრივად, ნიშნავს წახალისებას“, – განაცხადა ჭეიშვილმა.
მისივე თქმით, საზოგადოება ხედავს აბსოლუტურად ცრუ ნარატივს, რეალობისგან აცდენილ ფრაზებს იმის თაობაზე, რომ თუნდაც, ეს 4 ოქტომბრის შეკრება იყო მშვიდობიანი, არავის იქ არავითარი ძალადობრივი აქტი არ ჩაუდენია და ასე შემდეგ, რასაც ასევე წარსულშიც ვხედავდით.
„გავიხსენოთ იგივე ნოემბრის ბოლო, დეკემბრის პირველი დღეები, იგივე ტექსტებით არ გვესაუბრებოდნენ? არ ახდენდნენ იმ მცდარი აღქმის პირდაპირ მიზანმიმართულ ტირაჟირებას, რომ საქმე გვქონდა მშვიდობიან პროტესტთან?“, – განაცხადა ჭეიშვილმა.