7 ოქტომბერს ვატიკანმა ოფიციალურად განაცხადა, რომ ნოემბრის ბოლოს, პაპი ლეო XIV ექვსდღიანი ვიზიტით თურქეთსა და ლიბანში ჩავა, რაც საზღვარგარეთ მისი პირველი გამგზავრება იქნება კათოლიკური ეკლესიის მეთაურად არჩევის შემდეგ. 70 წლის ამერიკელ სასულიერო პირს თურქეთში 27-30 ნოემბერს ელოდებიან. „ვიზიტი მიზნად ისახავს მომლოცველობას იზნიკში ნიკეის პირველი მსოფლიო საეკლესიო კრების 1 700 წლისთავთან დაკავშირებით“, – განაცხადა ვატიკანის პრესსპიკერმა, მატეო ბრუნიმ. მისივე თქმით, პაპი 30 ნოემბრიდან 2 დეკემბრამდე თურქეთიდან ლიბანში გადაინაცვლებს და ამ ქვეყანაში მისი სტუმრობის გრაფიკი მოგვიანებით გახდება ცნობილი. ლიბანის პრეზიდენტმა, მარონიტმა ქრისტიანმა ჯოზეფ აუნმა, რომელმაც, ივნისში ვატიკანში ყოფნისას, ლეო თავის ქვეყანაში მიიწვია, ვიზიტს „ისტორიული მომენტი“ უწოდა.
„პაპის ვიზიტი არის მოწოდება მშვიდობისკენ, აღმოსავლეთში ქრისტიანობის პოზიციების განმტკიცებისკენ და ლიბანური მოდელის შენარჩუნებისკენ, რომელიც მსოფლიოსა და რეგიონს ესაჭიროება“, – ნათქვამია აუნის განცხადებაში. ივლისში პაპმა განაცხადა, რომ იმედოვნებდა, ნიკეის კრების 1 700 წლისთავთან დაკავშირებით, რაც ეკლესიის ისტორიაში მნიშვნელოვანი თარიღია, იზნიკს ეწვეოდა. ეს ვიზიტი მაისის თვისთვის მის წინამორბედს, პაპ ფრანცისკეს ჰქონდა დაგეგმილი, მაგრამ ის 21 აპრილს, 88 წლის ასაკში გარდაიცვალა. ნიკეაში, რომლის ადგილზე, სტამბოლიდან სამხრეთ-აღმოსავლეთით 100 კილომეტრში, ახლა ქალაქი იზნიკი მდებარეობს, ქრისტიანობის ისტორიაში პირველი მსოფლიო საეკლესიო კრება ჩვენი წელთაღრიცხვით 325 წელს გაიმართა.
იმპერატორ კონსტანტინეს მიერ მოწვეული კრება იყო პირველი, რომელზეც ქრისტიანი ეპისკოპოსები მთელი რომის იმპერიიდან შეიკრიბნენ. მან საფუძველი ჩაუყარა ნიკეის სიმბოლოს – სარწმუნოების ფორმულას, – რომელიც ერესებთან გამკლავებას ისახავდა მიზნად. სარწმუნოების ფორმულა ამბობს, რომ არსებობს ერთი ღმერთი, რომელიც სამ ნაწილად არსებობს – მამა ღმერთი, ძე ღმერთი (იესო) და სულიწმინდა, რაც ქრისტიანული კონფესიების უმეტესობისთვის ქვაკუთხედ დოქტრინად რჩება. მოსალოდნელია, რომ ლეოს ვიზიტი ლიბანში მშვიდობაზე იქნება ფოკუსირებული. მითუმეტეს, რომ ის იმართება ისეთ მრავალრელიგიურ ქვეყანაში, რომელმაც აიღო ვალდებულება, განაიარაღოს არასახელმწიფო შეიარაღებული ჯგუფები, კერძოდ, ირანის მიერ მხარდაჭერილი შიიტური მოძრაობა „ჰეზბოლა“.
ლიბანში ვიზიტის ორგანიზატორებთან დაახლოებულმა წყარომ სააგენტო „ფრანს პრესს“ განუცხადა, რომ პაპი, ვიზიტის ფარგლებში, ბეირუთის ჩრდილოეთით მდებარე წმინდა შარბელის ტაძარს მოინახულებს. 2024 წლის ნოემბერში ცეცხლის შეწყვეტის შესახებ შეთანხმების ძალაში შესვლის მიუხედავად, სამხრეთ ლიბანში, სტრატეგიულ სასაზღვრო პოზიციებზე, ისრაელი თავის ჯარებს ინარჩუნებს. ისრაელის ძალები ლიბანის ტერიტორიაზე რეგულარულად ახორციელებენ დარტყმებს და აცხადებენ, რომ მიზანში „ჰეზბოლას“ მებრძოლები და ინფრასტრუქტურა აქვთ ამოღებული. ბოლოს ლიბანს პაპი ბენედიქტე XVI 2012 წელს ეწვია, ხოლო თურქეთში ბოლო პაპის ვიზიტი 2014 წელს შედგა, როდესაც პაპი ფრანცისკე ანკარასა და სტამბოლს ესტუმრა და პრეზიდენტ რეჯეფ თაიფ ერდოღანს შეხვდა.
https://www.afp.com/en/agency/our-commitments/afp-charters