თვალწინ გვიდგას, როგორ ომახიანად გვიანონსებდნენ გადატრიალებას ისინი, ვინც ახლა აღმოჩნდა, რომ ავად არის, ხანდაზმულია… ვერავისთვის გახდება ინდულგენცია ის ფაქტი, რომ ვიღაც კარგად წერს ან კარგი კრეატიული დირექტორია, – განაცხადა საქართველოს პარლამენტის ვიცე-სპიკერმა ნინო წილოსანმა 4 ოქტომბრის საქმეზე დაკავებულებთან დაკავშირებით.
მისი თქმით, ის ადამიანები, ვინც იმუქრებოდა ხელისუფლების დამხობით, ახლა სპეკულირებენ ჯანმრთელობის ან ოჯახური მდგომარეობით.
„ალბათ ყველას თვალწინ გვიდგას, როგორ ომახიანად გვემუქრებოდნენ და გადატრიალებას გვიანონსებდნენ, მათ შორის პრეზიდენტის სასახლისკენაც როგორ თამამად მიემართებოდნენ ადამიანები, ვინც ახლა აღმოჩნდა, რომ ზოგი შეუძლოდ არის, ზოგი ავად არის, ზოგი ხანდაზმულია, ზოგი სხვადასხვა პროფესიის თუ ოჯახური სტატუსის მატარებელი არის და თურმე ამის გამო, მათი ეს დანაშაული და ის განზრახვა, რომელიც მათ საბედნიეროდ ვერ შეასრულეს, თუმცა მოქმედებდნენ მის აღსასრულებლად, უნდა ვაპატიოთ. ვერავისთვის გახდება ინდულგენცია ის ფაქტი, რომ ვიღაც კარგად წერს ან კარგი კრეატიული დირექტორია. ან ვიღაცას გარკვეული ასაკი არ უწყობდა ხელს, რომ რევოლუცია მოეხდინა“, – განაცხადა ნინო წილოსანმა.