„რომ ეთქვათ, ქართველ ხალხად წოდებული არასამთავრობო სექტორი და მათი აგენტურა ძალადობდა, ეს შეეწინააღმდეგებოდა მათ ცენტრალურ ნარატივს. შესაბამისად, მოსალოდნელი იყო ზუსტად ის რეაქცია, რომელიც ჩვენ ვნახეთ“, – განაცხადა გადაცემაში „EURO ანატომია“ პოლიტოლოგმა სოსო მანჯავიძემ საქართველოში 4 ოქტომბერს განვითარებული მოვლენებთან დაკავშირებით ევრობიუროკრატების პოზიციაზე საუბრისას.
კერძოდ, წამყვანმა მას ჰკითხა: „აშკარა ძალადობის კადრების უტყუარი მტკიცებულებების შემდეგ ელოდით, რომ ევროპელი ბიუროკრატები არათუ არ გაემიჯნებოდნენ ძალადობის დამხობის მონაწილეებს, არამედ მხარდაჭერას გამოუცხადებდნენ მათ და პასუხისმგებლობის გადატანას საქართველოს ხელისუფლებაზე შეეცდებოდნენ?“
სოსო მანჯავიძის თქმით, რა თქმა უნდა, ელოდა რომ ზუსტად ასე მოიქცეოდნენ, ვინაიდან რომ ეღიარებინათ საწინააღმდეგო, ეს შეეწინააღმდეგებოდა მათ მთავარ ნარატივს იმის შესახებ, თითქოს საქართველოში არსებობს მოძალადე ხელისუფლება.
წამყვანმა მას ასევე ჰკითხა, „ჩვენ ვიხილეთ მარტა კორსის და კაია კალასის განცხადება, სადაც ისინი გმობენ ორივე მხარისგან ძალადობას. ასეთივე განცხადება ჰქონდა ანიტა ჰიპერსაც მაშინ, როდესაც სიმართლე ფაქტებით არის დადასტურებული. რატომ ცდილობენ ევრობიუროკრატები დაგვიმტკიცონ თეთრზე შავი?“
სოსო მანჯავიძის თქმით, თუ ფაქტები ღაღადებენ მათი ნარატივის საწინააღმდეგოდ, მით უარესი ფაქტებისთვის.
„ფაქტები ეწინააღმდეგებოდა მათ პოლიტიკურ მიზნებს. შესაბამისად, ფაქტების ისეთი ინტერპრეტაცია გააჩაღეს, რომელიც არამხოლოდ სასაცილოა, ტრაგედიაც არის ეს. ჩვენ რას გვეუბნებიან – გვეუბნებიან იმას, რომ საერთოდ არანაირი ძალადობა არ ყოფილა, ღობეები საოცარი აქტიურობით გამოირჩეოდნენ, თვითონ იწვევდნენ მომიტინგეებს, შემდეგ გადაწვნენ, რომ შეეტყუებინათ. კიდევ კარგი, რომ მათ არ აქვთ მითოლოგიის ცოდნა, თორემ იტყოდნენ, რომ იქ სირინოზები ისხდნენ, შეიტყუეს მომიტინგეები და ცეცხლის გაჩნდა თავისით, ანუ, თვითაალება მოხდა. ასეთი რამეები ჯერჯერობით არ უთქვამთ, თუმცა უნდა ველოდოთ, რომ ზუსტად ასეთი სცენარით განვითარდება მოვლენები და სიგიჟე, რომლებსაც ისინი ავრცელებენ, კიდევ უფრო მწვავე ფორმებს მიიღებს. ამიტომ, ჩვენ იმის იმედი არ უნდა გვქონდეს, რომ იქ სიმართლეს მივაღწევთ.
„ვითარცა კუდი ძაღლისაი არ განემართების, არცა კირჩხიბი მართად ვალს“, ამათზეა ზუსტად ნათქვამი. შავზე გეუბნებიან, რომ თეთრია, თეთრზე, რომ შავია, თან გვეუბნებიან, რომ უნდა დაიჯერო და თან ენთუზიაზმი უნდა გამოხატო ამ დაჯერებისა. წინააღმდეგ შემთხვევაში, დაგაბრალებენ დავუშვათ პრორუსობას, ან პროჩინელობას, ან მსგავს რაღაც სიგიჟეს. აი, ეს არის“, – აღნიშნა სოსო მანჯავიძემ.