საქართველოში შეკრების და მანიფესტაციის თავისუფლება ნამდვილად დაცულია და ამ კანონში რეალური ცვლილება არ მომხდარა, – განაცხადა გადაცემაში „იმედი LIVE“ პარტია „ხალხის ძალის“ თავმჯდომარემ სოზარ სუბარმა გამკაცრებულ კანონმდებლობაზე საუბრისას.
მისივე თქმით, შეკრების და მანიფესტაციის თავისუფლება გულისხმობს გზის გადაკეტვის უფლებას იმ შემთხვევაში თუ ადამიანთა რაოდენობა ვერ ეტევა ქვეითთა სავალ ნაწილზე.
„იგივე შეგვიძლია ვთქვათ ადამიანის უფლებათა ევროპული სასამართლოს მიერ დადგენილ სტანდარტზე. თუ შემთხვევა ერთჯერადია, ეს უნდა მოითმინოს ხელისუფლებამ, თუმცა თუ ეს დიდხანს გრძელდება, ეს არ არის დემოკრატია, ეს არის მიმართული იმისკენ, რომ სახელმწიფოს დემოკრატიულ წყობილებას შეექმნას საფრთხე.
არსებულ კანონმდებლობას არ იცავდა მომიტინგეთა მცირე ჯგუფი, რამდენიმე ათეული თუ ასეული ადამიანი უბრალოდ თავის ნებას თავს ახვევდა ჩვენი ქვეყნის მილიონობით მოქალაქეს. ისინი მოქალაქეებს უქმნიდნენ დისკომფორტს, ამიტომ სახელმწიფო ვალდებულია დაიცვას იმ ადამიანების უფლებები, რომელთა თავისუფალი გადაადგილების უფლება იზღუდება. სწორედ ამიტომ იქნა მიღებული ისეთი კანონები, რომელიც უზრუნველყოფს დემოკრატიული სტანდარტის დაცვას, რომელსაც შეკრების და მანიფესტაციის კანონი ითვალისწინებს“, – აღნიშნა სოზარ სუბარმა.