ავღანეთის სათავეში „თალიბანის“ მოსვლის შემდეგ პირველად, ავსტრიამ ავღანეთის მოქალაქის სამშობლოში დეპორტაცია მოახდინა.
ამის შესახებ ინფორმაციას სააგენტო „როიტერი“ ავრცელებს.
„ამ დილით მოხდა სერიოზული დანაშაულებისთვის მსჯავრდებული მამაკაცის ქაბულში დეპორტირება – ეს 2021 წლის შემდეგ ავღანეთში პირველი დეპორტაციაა. ამგვარად ავსტრია აგზავნის მკაფიო გზავნილს: „ნულოვანი ტოლერანტობა ყველას მიმართ, ვინც ქვეყანაში ყოფნის უფლება სისხლის სამართლის დანაშაულის ჩადენით დაკარგა““, – დაწერა სოციალურ ქსელში ავსტრიის კანცლერმა, კონსერვატიული „ავსტრიის სახალხო პარტიის“ ლიდერმა, კრისტიან შტოკერმა.
მისი თქმით, ავსტრიის შინაგან საქმეთა სამინისტრო შემდგომ დეპორტაციებს ამზადებს.
აღნიშნული ქმედება გააკრიტიკა ორგანიზაცია „ამნესთი ინთერნეიშენალმა“, რომლის განცხადებით, ავღანეთი მსოფლიოში ერთ-ერთ ყველაზე საშიშ ქვეყნად რჩება.
ავსტრიის კოალიციურმა მთავრობამ არალეგალურ მიგრაციასთან ბრძოლა ერთ-ერთ მთავარ პრიორიტეტად დაასახელა. სამი ცენტრისტული პარტიისგან შემდგარი კოალიცია მარტში მას შემდეგ შეიქმნა, რაც საპარლამენტო არჩვნებში ულტრამემარჯვენე „თავისუფლების პარტიამ“ გაიმარჯვა, თუმცა მმართველი კოალიციის ფორმირება ვერ შეძლო.
ივლისში ავსტრია ევროკავშირის პირველი ქვეყანა გახდა, რომელმაც სირიაში მიგრანტის დეპორტი განახორციელა აღნიშნულ ქვეყანაში ომის დაწყების შემდეგ.