ყოფილ მეუღლეზე ძალადობის ბრალდებით დაკავებულმა ელდარ (ლუკა) კურტანიძემ ბოლო სასამართლო პროცესზე დანაშაულის მოტივზე ისაუბრა. ბრალდებულის თქმით, თითქოს მოძღვარმა, გაუმხილა, რომ მისი მაშინდელი მეუღლე, ხათუნა მიქაცაძე სხვა ადამიანთან ერთად ცხოვრობდა, რამაც მისი, როგორც მამაკაცის გაღიზიანება გამოიწვია.
გთავაზობთ მისი სიტყვების ზუსტ ციტირებას:
„მოძღვარმა მითხრა, რომ ხათუნა მიქაცაძე სხვა ადამიანთან ცხოვრობს. ეს ჩემთვის, ქართველი კაცისთვის ძალიან მიუღებელი იყო. ცერემონიალი ჩატარდა ჯვრის აყრის, დავურეკე და ვუთხარი, რომ ჩემს გრძნობებზე ითამაშე და იტყუე-მეთქი, ხელის გაწერაზე დამთანხმდა“.
როგორც ხათუნა მიქაცაძე „პრაიმტაიმთან“ საუბარში ამბობს, ეს ინფორმაცია სიმართლეს არ შეესაბამება. ხათუნა მიქაცაძე მოძღვრის ვინაობასაც გვიმხელს და ამბობს, რომ ის მამა ტარიელია (ტარიელ სიკინჭილაშვილი). ელდარ კურტანიძის მიერ გაჟღერებული ინფორმაციის გადასამოწმებლად „პრაიმტაიმი“ მამა ტარიელს დაუკავშირდა.
„მე დარწმუნებული ვარ, რომ მსგავსი არაფერი არ მაქვს ნათქვამი. რამეც რომ მცოდნოდა, წარმოიდგინეთ, მე ვარ მღვდელი და აღსარებაში ნათქვამი სხვა ვინმესთვის რომ მეთქვა, მაშინ ყველანაირი ღირსება უნდა ამყარონ და დიდი ხანია მღვდელი აღარ უნდა ვიყო. გამიჭირდა დაჯერება, რომ ლუკამ ასეთი რამ თქვა, ღმერთმა აპატიოს, თუ ეს ყველაფერი თავის მართლების მიზნით გამოიყენა“,- ამბობს ტარიელ სიკინჭილაშვილი.
ხათუნა მიქაცაძის თქმით, სასამართლო დავაში სასულიერო პირის ჩათრევა, მით უმეტეს აღსარების საიდუმლოს სახელით, მძიმე ცილისწამებაა.
„დარწმუნებული ვარ, რომ მას მოძღვარი და ეკლესია გაუაზრებლად არ უხსენებია. როცა ადამიანი თავის გაუმართლებელ საქციელებზე პასუხისმგებლობის დაკისრებას მოძღვარზე ცდილობს და ეკლესიას ეფარება – ეს მისი მხრიდან მიზანმიმართული მანიპულაციაა. ეს არის მისი მცდელობა, რომ თავისი პირადი ცხოვრება, დანაშაულები და შეცდომები სიწმინდეზე სპეკულაციით გადაფაროს. ამ ყველაფერს „ღრმად მორწმუნე“ , აღმსარებელი თუ მქადაგებელი, კურტანიძე სასამართლოს ნდობის მოსაპოვებლად და საზოგადოების აზრზე გავლენის მოსახდენად აკეთებს“, – ამბობს ხათუნა მიქაცაძე.
შეგახსენებთ, რომ ელდარ ლუკა კურტანიძე მოსამართლის გადაწყვეტილებით პატიმრობაში რჩება. მისი ადვოკატის, ივანე მეფარიშვილის თქმით, კურტანიძე წარდგენილი ბრალიდან ერთს – ოჯახის წევრის მიმართ ძალადობას აღიარებს, ხოლო დანარჩენს სამს არა. კურტანიძეს ბრალდება ოჯახის წევრის მიმართ ძალადობის, ოჯახის წევრის ნივთის განზრახ დაზიანებისა და ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობის მუხლით აქვს წარდგენილი.