“შეერთებულ შტატებში “ფარას“ კანონის გამკაცრებას ითხოვს ადამიანი, რომელიც საქართველოს ინტერესების საწინააღმდეგო განცხადებებით არის გამორჩეული”

„შეერთებულ შტატებში „ფარას“ კანონის გამკაცრებას ითხოვს ადამიანი, რომელიც საქართველოს ინტერესების საწინააღმდეგო განცხადებებით არის გამორჩეული,“- ამის შესახებ იურიდიულ საკითხთა საპარლამენტო კომიტეტის თავმჯდომარემ, არჩილ გორდულაძემ შეერთებულ შტატებში „ფარას“ გამკაცრების კანონპროექტზე საუბრისას განაცხადა.

„ჩვენ ვიხილეთ დასკვნა ვენეციის კომისიისა, რომელიც აკრიტიკებს ამერიკის შეერთებულ შტატებში მოქმედი „ფარას“ ანალოგს და ზუსტ თარგმანს საქართველოში. ამავდროულად კრიტიკა მოვისმინეთ პაველ ჰერჩინსკისგან მაშინ, როდესაც ამერიკის შეერთებულ შტატებში ამ კანონის გამკაცრებას ითხოვს ადამიანი, რომელიც საქართველოს ინტერესების საწინააღმდეგო განცხადებებით არის გამორჩეული. ეს არის უსტანდარტობა, რომ როდესაც კანონი მნიშვნელოვანია ამერიკელი ხალხისთვის, თურმე ეს არ შეიძლება, მიღებული იყოს საქართველოში და თურმე ეს არის დემოკრატიული საწყისების ღალატი და უკან დახევა. შეგვიძლია, თამამად ვთქვათ, რომ პაველ ჰერჩინსკის განცხადებებიდან გამომდინარე იგი აკრიტიკებს არა საქართველოში, არამედ ამერიკის შეერთებულ შტატებში მოქმედ კანონს”, – განაცხადა არჩილ გორდულაძემ.

„ქრონიკის“ ინფორმაციით, ამერიკის შეერთებული შტატების სენატში ინიციირებულია კანონპროექტი S.3050, რომელიც მიზნად ისახავს 1938 წლის „უცხოელი აგენტების რეგისტრაციის აქტში“ (FARA) ცვლილებების შეტანას.

როგორც აშშ-ის კონგრესის საიტზე გამოქვეყნებულ ინფორმაციაშია აღნიშნული, ცვლილებები შეეხება ამ აქტით გათვალისწინებული გამონაკლისების მოთხოვნების მოდიფიცირებას.