ბირთვული მასალა ურანის საქმეზე დაკავებულ ჩინეთის სამ მოქალაქეს ბრალი წარუდგინეს.
ადვოკატების ინფორმაციით, ისინი დანაშაულს არ აღიარებენ. როგორც სახელმწიფო უსაფრთხოების სამსახურში განაცხადეს, დანაშაულებრივი ჯგუფის წევრები თბილისში გეგმავდნენ რადიოაქტიური ნივთიერების უკანონო შეძენას 400 ათას დოლარად და შემდეგ უკანონო ტრანსპორტირებას ჩინეთში, რუსეთის ფედერაციის ტერიტორიის გავლით. ჩინეთის ერთ-ერთმა მოქალაქემ, რომელიც საქართველოს ტერიტორიაზე რეჟიმის დარღვევით იმყოფებოდა, ქვეყანაში ჩამოიყვანა ურანის შეძენით დაინტერესებული ექსპერტები და აქტიურად დაიწყო ბირთვული მასალის მოძიება. გამოძიების ფარგლებში, გაიჩხრიკა დაკავებულების დროებითი საცხოვრებელი ადგილები თბილისსა და ბათუმში.
„ბრალს არ აღირებს, თავს დამნაშავედ არ ცნობს. ბათუმში ჩამოვიდა. რა თქმა უნდა, მას საზღვარი კანონიერად აქვს გადმოლახული. ჩამოვიდა კონკრეტული მიზნით. უბრალოდ, გამოძიების ამ ეტაპზე მას ამასთან დაკავშირებით საუბარი არ სურს“, – განაცხადა ერთ-ერთმა ადვოკატმა თამარ გაგუამ.
კიდევ ერთი ადვოკატის, ნინო ბერიშვილის თქმით, მისი დაცვის ქვეშ მყოფი ამ ეტაპზე დუმილის უფლებას იყენებს.
„აღნიშნა, რომ ამ საქმესთან დაკავშირებით თარჯიმანი იყო და ბრალში მოყვანილ ფაქტობრივ გარემოებებს არ აღიარებს“, – განაცხადა მან.