ქუთაისის საერთაშორისო უნივერსიტეტის საპატიო პრეზიდენტმა ვოლფგანგ ჰერმანმა, რომელიც მიუნხენის ტექნიკური უნივერსიტეტის ემერიტუს პრეზიდენტია, „იმედი კვირასთან“ KIU-ის ამჟამინდელ ხარისხზე და განვითარების სამომავლო ხედვაზე ისაუბრა.
მან ასევე გაიხსენა, როგორ იწყებოდა ქუთაისის საერთაშორისო უნივერსიტეტის პროექტი.
„5 წლის წინ ყველაფერი მცირე მასშტაბით დაიწყო. ყველანი განცვიფრებულნი ვიყავით ბატონი ივანიშვილის ამ შესანიშნავი წინადადებით, რომ შეგვექმნა საქართველოში საერთაშორისო სტანდარტების უნივერსიტეტი. თავდაპირველად მცირე ზომის პროექტი გახლდათ, მაგრამ გვქონდა ენთუზიაზმი, ჩავდეთ გამოცდილება და ძალისხმევა ამ საქმეში. ეს იყო სასიამოვნო პროცესი და ზრდამაც არ დააყოვნა“, – განაცხადა ქუთაისის საერთაშორისო უნივერსიტეტის საპატიო პრეზიდენტმა.
ვოლფგანგ ჰერმანმა ასევე აღნიშნა, რომ საქართველოს შეუძლია, გახდეს სამაგალითო უახლოეს მომავალში, როგორც მაღალი ხარისხის საუნივერსიტეტო სისტემის მქონე ქვეყანა.
„ჩვენ გვყავს უმაღლესი დონის უცხოელი და ქართველი პროფესორები, სწავლა ინგლისურადაა. ამ შესანიშნავ პროფესორებს მოჰყვება საუკეთესო სტუდენტები. რაც უფრო მეტი წარჩინებული სტუდენტი გვეყოლება, მით უფრო საინტერესო გახდება ეს უმაღლესი სასწავლებელი სხვა პროფესორებისთვისაც. ეს არის წრე, რომელიც უკეთესობისაკენ ბრუნავს. დარწმუნებული ვარ, რომ ყველა მიზანს ნაბიჯ-ნაბიჯ მივაღწევთ. ვაპირებთ ზრდას და კვლევით მიმართულებაზე კონცენტრირებას.
ჩვენი მიზანია, ვიყოთ სამაგალითო, არამარტო საქართველოს, არამედ მთელი რეგიონის მასშტაბით. საქართველოს შეუძლია, გახდეს სამაგალითო უახლოეს მომავალში როგორც მაღალი ხარისხის საუნივერსიტეტო სისტემის მქონე ქვეყანა. ესაა სწორედ ჩვენი მიზანი“, – განაცხადა KIU-ის საპატიო პრეზიდენტმა.