ძალიან იმედგამაცრუებელი იქნება ქართველი ხალხისთვის, თუ ევროკავშირში მიიღებენ ასეთ უსამართლო გადაწყვეტილებას, – განაცხადა გადაცემაში „იმედი LIVE“ საქართველოს პარლამენტის თავმჯდომარის მოადგილემ ნინო წილოსანმა ვიზალიბერალიზაციის შეჩერების შესაძლებლობაზე საუბრისას.
მისივე თქმით, ქართველ ხალხს არ დაუმსახურებია, რომ ეს სამართლიანად მიღებული ბენეფიტი შეეზღუდოს.
„ეს იქნება უსამართლობა და ბრაზის საფუძველიც ქართველ ხალხში. ჩვენ კარგად ვაცნობიერებთ არჩევანს, რის საპირწონედ გვთხოვენ ვიზალიბერალიზაციის შენარჩუნებას. თუ ჩვენი იდენტობა და ყველაფერი, რაზეც დგას ეს ქვეყანა, დავთმეთ იმისთვის, რომ ვიაროთ კომფორტულად, ასეთ არჩევანს არც ერთი ჭეშმარიტი ქართველი არ გააკეთებს. არც ჩვენ გვაქვს იმის უფლება, რომ ასეთი უღირსი არჩევანი გავაკეთოთ“, – აღნიშნა ნინო წილოსანმა.
საქართველოს პარლამენტის თავმჯდომარის მოადგილემ ვიზალიბერალიზაციის შესაძლო შეჩერებასთან დაკავშირებით მის მოლოდინებზეც ისაუბრა.
„ვერ გამოვრიცხავ, თუმცა 4 ოქტომბრის არჩევნების შედეგებმა, რომელმაც აჩვენა, რომ ქართველები არ შეიცვლიან პოზიციას შანტაჟის მიუხედავად, შეიძლება გარკვეული გავლენა მოახდინოს და არ მიიყვანონ იმ არასწორ გადაწყვეტილებამდე, რომელიც ვიზალიბერალიზაციის შეჩერებას გულისხმობს. არ შექმნიან კარგ განწყობას, თუ ასეთ სადამსჯელო ღონისძიებას გამოიყენებენ მხოლოდ იმიტომ, რომ ქართველებმა აირჩიეს დამოუკიდებლობა და არა ვიღაცის ბატონობის ქვეშ ყოფნა“, – აღნიშნა ნინო წილოსანმა.