ტურიზმის ეროვნული ადმინისტრაციის ხელმძღვანელმა მაია ომიაძემ წლის პირველი ცხრა თვის შედეგები შეაჯამა. ინფორმაციას ტურიზმის ეროვნული ადმინისტრაცია ავრცელებს.
მისი თქმით, ადმინისტრაციის მიერ წლის დასაწყისში დადგენილი 4.7 მილიარდი აშშ დოლარის პროგნოზი სრულად რეალიზებად იჩანს. იანვარი-სექტემბრის პერიოდში საერთაშორისო ტურიზმიდან შემოსავალმა ახალ რეკორდულ მაჩვენებელს მიაღწია და 3.6 მილიარდ აშშ დოლარს გადააჭარბა -3,637,761,827 აშშ დოლარი შეადგინა.
„ტურიზმის ეროვნული ადმინისტრაცია ტრადიციულად ადგენს პროგნოზებს როგორც კვარტლების, ისე სეზონების მიხედვით. ეს პროგნოზები ეფუძნება გასული წლის მონაცემებს და საერთაშორისო ტენდენციებს, როგორც საერთაშორისო მოგზაურების, ისე ტურისტული მოგზაურების და შემოსავლების ჭრილში. კვლევითი კომპანიების პროგნოზები და ტურიზმის ეროვნული ადმინისტრაციის შეფასებები ერთმანეთს თითქმის ემთხვევა, რაც მიუთითებს შეფასებების სიზუსტესა და რეალისტურობაზე.
თუ შევაფასებთ 2019 წლის შემდეგ აღდგენის დინამიკას, საერთაშორისო მოგზაურობების და შემოსავლების თვალსაზრისით, პროგნოზები იძლევა საფუძველს ვთქვათ, რომ მიღწეული შედეგები სრულად შეესაბამება მოლოდინებს. ამ ეტაპზე შეგვიძლია ამაყად განვაცხადოთ, რომ 2025 წლის ბოლოსთვის, როდესაც დაიხურება წლის მეოთხე კვარტალი, პროგნოზები სრულად გამართლდება“, – აღნიშნა ტურიზმის ეროვნული ადმინისტრაციის ხელმძღვანელმა.
მაია ომიაძის განცხადებით, ტურიზმის ეროვნული ადმინისტრაციის სწორი სტრატეგიისა და სამიზნე ბაზრებზე აქტიური კამპანიების შედეგად, წელს მიღებული შემოსავლები მნიშვნელოვნად აჭარბებს 2019 წლის მონაცემებს.
„მიუხედავად იმისა, რომ საერთაშორისო მოგზაურობების რაოდენობა ჯერ კიდევ აღდგენის პროცესშია, ტურიზმიდან მიღებული შემოსავლები მნიშვნელოვნად აღემატება 2019 წლის დონეს. ეს შედეგი ნათლად აჩვენებს, რომ ჩვენი სტრატეგია, რომელიც მაღალმხარჯველი ტურისტების მოზიდვაზეა ორიენტაცია, სრულად ამართლებს ჩვენს მოლოდინებს. შესაძლოა, მოგზაურების რაოდენობა შედარებით ნაკლები იყოს, თუმცა თითოეული მათგანი ბევრად მეტ თანხას ხარჯავს საქართველოში,“ – აღნიშნა ომიაძემ.