პარლამენტის საგარეო ურთიერთობათა კომიტეტის თავმჯდომარის, ნიკოლოზ სამხარაძის განცხადებით, გახარიას პარტია საკუთარ თავთან დამარცხდა.
სამხარაძის თქმით, პარტიას „გახარია საქართველოსთვის“ მოუწია აღიარება, რომ ამდენი ხნის განმავლობაში საზოგადოებას ატყუებდნენ, თითქოს არჩევნები გაყალბებული იყო.
„ეს ჩვენ არც არაფერს გვმატებს და არც არაფერს გვაკლებს. ეს მათთვის განაჩენის გამოტანაა. არ მეგულება ადამიანი, ვინც ამის შემდეგ აღნიშნულ პარტიას მხარს დაუჭერს, რადგან ერთი წლის განმავლობაში იტყუებოდნენ. ახლა, როცა ნახეს, რომ სხვა გამოსავალი არ არის, პარლამენტში შემოლაგდნენ. უპერსპექტივობა დაინახეს და ამიტომ შემოლაგდნენ“, – აღნიშნა ნიკოლოზ სამხარაძემ.
პარტიამ „გახარია საქართველოსთვის“ პარლამენტში შესვლის გადაწყვეტილების თაობაზე 20 ოქტომბერს განაცხადა. პარტიაში აღნიშნეს, რომ პარლამენტის და საკრებულოების ტრიბუნის არგამოყენება არა მხოლოდ შეცდომა, არამედ დანაშაულია ქვეყნისა და ხალხის წინაშე. გახარიას პარტიის წევრები პარლამენტში დღეს მივიდნენ.
ამასთან, 26 ოქტომბერს პარტიის „გახარია საქართველოსთვის“ პოლიტსაბჭოს წევრმა, რუსუდან თევზაძემ განაცხადა, რომ უარს ამბობს საპარლამენტო მანდატზე და ტოვებს პარტიას.