კოპენჰაგენში, ჯანმრთელობის მსოფლიო ორგანიზაციის ევროპის რეგიონული კომიტეტის 75-ე სესია ტარდება, რომელშიც ჯანდაცვის მინისტრი მიხეილ სარჯველაძე მონაწილეობს.
დელეგატებს სიტყვით მიმართა გენერალურმა დირექტორმა, ტედროს ადანომ გებრეისუსმა. გასული წლის ანგარიში წარადგინა ევროპის რეგიონულმა დირექტორმა, ჰანს კლუგემ, რომელმაც საქართველოში პირველადი ჯანდაცვის მიმართულებით გატარებულ რეფორმას ისტორიული უწოდა და მიხეილ სარჯველაძეს აღნიშნული წარმატება მიულოცა.
სესიაზე სიტყვით გამოვიდა საქართველოს ჯანდაცვის მინისტრი. მიხეილ სარჯველაძემ იმ პროგრამასა და რეფორმაზე ისაუბრა, რომელიც მოქალაქეების ფინანსურ დაცულობას, ასევე, მაღალი ხარისხის სამედიცინო მომსახურებებსა და მედიკამენტებზე თანაბარ ხელმისაწვდომობას უზრუნველყოფს. მან საქართველოში ჯანდაცვის მიმართულებით განხორციელებული რეფორმების აქტიური მხარდაჭერისთვის მადლობა გადაუხადა ჯანმრთელობის მსოფლიო ორგანიზაციას, მის ხელმძღვანელებსა და ევროპის რეგიონულ დირექტორს, ჰანს კლუგეს.
ევროპის რეგიონული კომიტეტის 75-ე სესიაში მიხეილ სარჯველაძესთან ერთად მონაწილეობს ჯანდაცვის მინისტრის მოადგილე ირაკლი სასანია. ღონისძიებას ასევე ესწრებიან: საქართველოს საგარეო საქმეთა მინისტრის მოადგილე ლაშა დარსალია და დანიის სამეფოში საქართველოს საგანგებო და სრულუფლებიანი ელჩი ნატა მენაბდე.
სესიის ფარგლებში ტარდება ჯანდაცვის მსოფლიო ორგანიზაციის აღმასრულებელი ბორდისა და ევროპის რეგიონის ჯანდაცვის კომიტეტის წევრების არჩევნები.
სამდღიანი ღონისძიების ფარგლებში 53 წევრი ქვეყნის, პარტნიორი ორგანიზაციებისა და სამოქალაქო საზოგადოების წარმომადგენლები იმსჯელებენ ევროპის სამუშაო პროგრამის პროექტზე 2026-2030 წლებისთვის (EPW2), რომლის მიზანიც ჯანმრთელობის სფეროში არსებული გამოწვევების დასაძლევად სტრატეგიული ხედვის ჩამოყალიბება და ხუთწლიანი გეგმის განსაზღვრაა. სესიაზე განიხილავენ 2026–2030 წლებისთვის ბავშვთა და მოზარდთა ჯანმრთელობისა და კეთილდღეობის სტრატეგიას ევროპის რეგიონში. ასევე, 2025-2030 წლებისთვის ინოვაციების გამოყენების სტრატეგიას საზოგადოებრივი ჯანმრთელობისათვის ევროპის რეგიონში.