მანდატურზე თავდასხმის ბრალდებით დაკავებულმა ნინო დათაშვილმა საპატიმრო დატოვა.
დღეს დათაშვილს ჯანმრთელობის მდგომარეობის გამო, აღკვეთის ღონისძიება პატიმრობა 5000-ლარიანი გირაოთი შეეცვალა.
დათაშვილის უფლებადამცველის განმარტებით, აღკვეთის ღონისძიებად პატიმრობის შეფარდება საქმიდან გამომდინარე, არარელევანტური იყო.
„ჩვენ პირველ წარდგენით სხდომაზე ვუთითებდით ამ საფრთხეებზე. ეს არ არის ახალი და დაცვის მხარე ამაზე აპელირებდა ძალიან დიდი ხანია. ნინო ბოლო სასამართლო პროცესებში საერთოდ ვერ იღებდა მონაწილეობას. სასამართლოსთვის ეს ცნობილი იყო, თუმცა ნინოს არ შეეცვალა აღკვეთის ღონისძიება. ვნახეთ, რომ მისი მდგომარეობა უკიდურესად დამძიმდა და ახლა ორი ქირურგიული ოპერაცია ესაჭიროება. შეფასებისთვის შეიძლება ვთქვათ, რომ ეს არ იყო აღკვეთის ღონისძიების შეფარდება, ეს იყო დასჯის მიზანი ნინო დათაშვილისთვის, რადგან პატიმრობა არ იყო რელევანტური ამ საქმეში“, – განაცხადა უფლებადამცველმა.
სასამართლო პროცესის დაწყებამდე პროკურატურამ განცხადება გაავრცელა, სადაც აღკვეთის ღონისძიების შეცვლას ითხოვდა. პროკურატურამ გირაოს თანხა 5 000 ლარი დაასახელა, გადახდის ვადად კი – 30 დღე. შუამდგომლობას დაეთანხმა დაცვის მხარეც, მათ წარმოდგენილი ჰქონდათ შესაბამისი სამედიცინო დასკვნაც კლინიკა „ვივამედიდან“.
ცნობისთვის, ნინო დათაშვილი თბილისის საქალაქო სასამართლოში 9 ივნისს მომხდარი ფაქტის გამო 20 ივნისს დააკავეს. მას ბრალდება წარედგინა საქართველოს სისხლის სამართლის კოდექსის 353-ე სეკუნდა მუხლის მე-3 ნაწილით, რაც გულისხმობს საჯარო მოსამსახურეზე თავდასხმას სამსახურებრივი მოვალეობის შესრულების დროს. აღნიშნული სასჯელის სახედ და ზომად ჯარიმას ან 4-დან 7 წლამდე თავისუფლების აღკვეთას ითვალისწინებს.