დიახ, ჩვენ გვაქვს სურვილი, რომ გავხდეთ ევროკავშირის წევრი, ევროპის ნაწილი, თუმცა იმ ღირებულებებით, რასაც საუკუნეებია ვიცავთ და გვინდა, რომ ჩვენი ეროვნული ინტერესი იყოს გამოკვეთილად დაცული, – განაცხადა საქართველოს პრეზიდენტმა მიხეილ ყაველაშვილმა გადაცემაში „თავისუფალი სივრცე“ ევროკავშირის ელჩის განცხადებაზე საპასუხოდ, რომლის თქმითაც, საქართველოში მიღებული კანონებით ქვეყანა ვერ გახდება ევროკავშირის წევრი, რადგან ის ეწინააღმდეგება ევროკავშირის პრინციპებს.
პრეზიდენტის განცხადებით, სამართლებრივ სივრცეში სურვილის მიხედვით მოქმედება დაუშვებელია.
“საშინაო დავალება იქნება, კანონმდებლობის შეცვლა თუ ა.შ. ექვემდებარება პარტნიორულ ურთიერთობას, დიალოგს და სჯა-ბაასს იმასთან დაკავშირებით, თუ რას ეწინააღმდეგება ჩვენი მიღებული კანონები, რომელ საერთაშორისო სამართალს ეწინააღმდეგება. ესე არ არის, რომ მხოლოდ სურვილის მიხედვით ვიმოქმედოთ, მითუმეტეს სამართლებრივ სივრცეში, როცა კანონზე აქვთ საუბარი, კანონი უნდა განიხილებოდეს, რაში ეწინააღმდეგება საერთაშორისო სამართალს. ამისთვის ჩვენ მზად ვართ, მუდმივად მზადყოფნას გამოვთქვამთ”, – აღნიშნა მიხეილ ყაველაშვილმა.
როგორც პრეზიდენტმა განაცხადა, ევროკავშირის ელჩის გზავნილი არ შეეფერება იმ გაერთიანების ძალისხმევას, რისთვისაც შეიქმნა ევროკავშირი.
„ჩვენი ევროკავშირში გაწევრიანების პროცესი დღეს არ დაწყებულა. მუდმივად არის ამაზე აპელირება, რომ ჩვენ ევროპა ვართ და ევროპაში გვინდა და ეს დიდი სურვილია ჩვენი წინაპრების, არაერთი თაობა იყო ამის მოსურნე და უამრავი ქარტეხილები გაიარა ჩვენმა ქვეყანამ იმისათვის, რომ ევროპის სრულუფლებიანი წევრი გამხდარიყო – ეს პროცესი არ შეჩერებულა, მაგრამ 3000 წლოვანი ქვეყანა ვართ, რომელსაც ძალიან ბევრი გამოწვევა ჰქონდა ამ საუკუნეების მანძილზე, საკმაოდ დიდი გამოცდილება შეიძინა, იმისთვის, რომ პრევენცია განახორციელოს და მთავარ საკითხად ყოველთვის იყოს შენარჩუნებული მისი იდენტობა”,- განაცხადა საქართველოს პრეზიდენტმა.