2022 წლის 28 მარტს ქალაქმა ბრიუსელმა მიიღო დადგენილება, რომლითაც თავის ტერიტორიაზე მოწყალების თხოვნა აუკრძალა ნებისმიერ პირს, ვისაც თან 16 წლამდე ასაკის ბავშვი ახლდა. ამ რეგულაციის შემოღების არგუმენტად ბელგიის დედაქალაქის ხელისუფლებამ 18 წლამდე ასაკის ახალგაზრდებისთვის სავალდებულო სასკოლო განათლების მიღებისა და ბავშვთა უფლებების დაცვის აუცილებლობა დაასახელა. დადგენილების მოწინააღმდეგეთა აზრით კი, ხდება პირიქით – ისედაც სტიგმატიზებული ადამიანები, ამ ზომის შემოღებით, კიდევ უფრო მეტად ისჯებიან, მითუმეტეს იმ პირობებში, როდესაც მათხოვრობის პრობლემის გადასაჭრელად არაფერი კეთდება. „საუკეთესო შემთხვევაში, ამ რეგულაციამ შესაძლოა მოწყალების მთხოვნელ პირებს ადგილი შეაცვლევინოს და ისინი „უხილავებად“ აქციოს ისე, რომ მათ საჭიროებებზე არანაირი რეაგირება არ მოხდეს. უარეს შემთხვევაში კი, ისინი სიღარიბისთვის დაისჯებიან“, – აცხადებენ აკრძალვის მოწინააღმდეგენი.
სახელმწიფო საბჭო რეგულაციას აუქმებს
სახელმწიფო საბჭო (ბელგიის მთავრობასთან არსებული უმაღლესი ადმინისტრაციული სასამართლო და იურიდიული საკონსულტაციო ორგანო – რედ.) მიიჩნევს, რომ სისხლის სამართლის კოდექსი უკვე ითვალისწინებს პასუხისმგებლობას მათხოვრობის იძულებისთვის (ექსპლუატაციისთვის). აქედან გამომდინარე, კომუნებს არ აქვთ უფლება, საკუთარ თავს მიანიჭონ იმის უფლებამოსილება, რომ ამ ქმედებისთვის ადამიანები, ადმინისტრაციული ჯარიმების მეშვეობით, მეორედ დასაჯონ. „მუნიციპალიტეტებს შეუძლიათ, გარკვეული ფორმით ადამიანების დასჯის გადაწყვეტილებები მიიღონ, ოღონდ მხოლოდ იმ ქმედებებისთვის, რომლებიც სისხლის სამართლის კოდექსით განსაზღვრული არ არის. თუმცა, მათ ეს უნდა გააკეთონ პროპორციული გზით და მკაფიოდ განსაზღვრონ სამიზნე ადგილები, დრო ან მეთოდები“, – აცხადებს უმაღლესი ადმინისტრაციულ-საკონსულტაციო ორგანო. მისი შეფასებით, ბრიუსელის რეგულაციაში პროპორციულობის პრინციპი დაცული არ არის.
რეგულაციის მოწინააღმდეგეთა აზრით, მათხოვრობის იძულების სისხლისსამართლებრივი დანაშაული არ ფარავს იმ შემთხვევებს, როდესაც მშობელი საკუთარ შვილთან ერთად მათხოვრობს. მათი მტკიცებით, ასეთ შემთხვევებში, საჭიროა სოციალური და არა სისხლისსამართლებრივი რეაგირება. ქალაქ ბრიუსელის ხელმძღვანელობა სწავლობს სახელმწიფო საბჭოს გადაწყვეტილებას და კომენტარს ჯერჯერობით არ აკეთებს.