26 ნოემბერს, ამერიკელმა და რუსმა მომლაპარაკებლებმა აბუ-დაბიში სამშვიდობო შეთანხმების გადამუშავებულ პროექტზე კონსულტაციები დაასრულეს, – იუწყება The Economist-ი. გამოცემის წყაროს ცნობით, დოკუმენტი ჯერ კიდევ დამუშავების პროცესშია, მაგრამ მოლაპარაკებები უკრაინის სასარგებლოდ არ მიდის: დისკუსიები ფოკუსირებულია რუსეთის მოთხოვნების უკრაინის დათმობებთან შეთავსებაზე.
„და საბოლოო სიტყვა, სავარაუდოდ, კრემლს ექნება“, – ხაზს უსვამს გამოცემა.
სტატიის თანახმად, თავდაპირველ 28-პუნქტიან გეგმას აშკარად პრორუსული მიკერძოება ჰქონდა: ის უკრაინისთვის ტერიტორიულ დათმობებს, მისი არმიის რაოდენობრივ შეზღუდვებს და შეერთებული შტატებისთვის ფინანსურ დათმობებს ითვალისწინებდა. გადამუშავებული 19-პუნქტიანი ვერსია ზოგიერთ მოთხოვნას არბილებდა, მაგრამ ძირითადი „ეკლიანი“ საკითხები – დონეცკის სტატუსი, ნატოში წევრობა და ამერიკის უსაფრთხოების გარანტიები – აშშ-ის პრეზიდენტ დონალდ ტრამპს გადასაწყვეტი დარჩა.
The Economist-ი ასევე უკრაინისთვის ორ მთავარ საფრთხეს ასახელებს: შიდა, რომელიც დაკავშირებულია ფართოდ გავრცელებულ კორუფციასთან და გარე – ფრონტის ხაზზე გაუარესებული სიტუაციის გამო.
წყარომ The Economist-ს ასევე განუცხადა, რომ უკრაინის შესახებ სამშვიდობო მოლაპარაკებები შეიძლება კიდევ რამდენიმე თვე გაგრძელდეს.