კახეთის სააგენტოს ნამდვილად გადასცა შსს-მ 12 ძაღლი, რომლებიც წლების განმავლობაში კეთილსინდისიერად ემსახურებოდნენ საზოგადოების უსაფრთხოებას და ასაკიდან გამომდინარე ზოგადად უნარების დაქვეითების გამო ვეღარ ასრულებდნენ თავიანთ ფუნქციას, – წერს სოციალურ ქსელში მიუსაფარ ცხოველთა პოპულაციის მართვის კახეთის სააგენტოს კონცეპტუალური პროექტის თანაავტორი ლაშა გეგეჭკორი. როგორც ის აღნიშნავს, 12 ძაღლიდან უკვე გაჩუქდა 5 ძაღლი, მიმდინარეობს დანარჩენი ძაღლების გაჩუქებისთვის შესაბამისი ქმედებები და თუ ისინი არ გაჩუქდნენ, სიცოცხლის ბოლომდე სახელმწიფოს კმაყოფაზე იცხოვრებენ.
გეგეჭკორი გარკვეულ ჯგუფებს მოუწოდებს, შეწყვიტონ შსს-ს და ზოგადად სახელმწიფოს უსაფუძვლო დამუნათება
„მ/წ 1 დეკემბერს, შინაგან საქმეთა სამინისტროდან მიუსაფარ ცხოველთა პოპულაციის მართვის კახეთის სააგენტოს გადაეცა 12 ძაღლი. სოციალურ ქსელში, სხვადასხვა გვერდზე და ჯგუფში ვრცელდება სპეკულაციური განცხადებები აღნიშნულის შესახებ. ჩემსა და მიუსაფარ ცხოველთა პოპულაციის მართვის კახეთის სააგენტოს დირექტორ თეიმურაზ ზავრაშვილს შორის საუბრის შემდეგ საზოგადოებას მივაწვდი შემდეგ ინფორმაციას: კახეთის სააგენტოს ნამდვილად გადასცა შსს-მ 12 ძაღლი, რომლებიც წლების განმავლობაში კეთილსინდისიერად ემსახურებოდნენ საზოგადოების უსაფრთხოებას და ასაკიდან გამომდინარე ზოგადად უნარების დაქვეითების გამო ვეღარ ასრულებდნენ თავიანთ ფუნქციას. 12 ძაღლიდან უკვე გაჩუქდა 5 ძაღლი. მიმდინარეობს დანარჩენი ძაღლების გაჩუქებისთვის შესაბამისი ქმედებები და თუ ისინი არ გაჩუქდნენ, სიცოცხლის ბოლომდე სახელმწიფოს კმაყოფაზე იცხოვრებენ კახეთის სააგენტოში. შსს-ს სამომსახურეო (K-9) ძაღლები გავიდნენ დამსახურებულ პენსიაზე. მათ არ აკლიათ და ადგილზე შექმნილია მათი კეთილდღეობისთვის აუცილებელი პირობები.
დამატებით გაცნობებთ, რომ ეს, შსს-ს მიერ კახეთის ცენტრისთვის ძაღლების გადაცემის მეორე შემთხვევაა. პრაქტიკა გვიჩვენებს რომ როგორც წესი, ეს ძაღლები ადგილზე დიდხანს არ რჩებიან. ამას განაპირობებს მათი წრთვნა და მიღებული უნარ-ჩვევები. კახეთის სააგენტო ძაღლების გაჩუქების შემდეგ ახორციელებს მონიტორინგს მათ მოვლა-პატრონობაზე.
გარკვეულ ჯგუფებს მოგიწოდებთ, შეწყვიტოთ შსს-ს და ზოგადად სახელმწიფოს უსაფუძვლო დამუნათება“, – წერს გეგეჭკორი.